剝皮寮
劉鴻水理事長提早到場， 張羅會場標誌
劉興欽博士V.S.宋細福博士
大師一面圖解，一面講古，本等無人比得起
劉會長推崇 劉博士 為善最樂
張淑芬會長介紹 台灣語言文化社出版个<桐花版客語主教材>，敬請客語先生多使用
主講者：「發明大王」 劉興欽 博士
貴賓： 菇類博士 宋細福 教授
主持：台灣客家教師協會 劉鴻水理事長
台灣鄉土母語教育協會 張淑芬會長
大師正登場 就係叮噹響
前一日正知這演講个詳細，為著愛親睇從細就識「阿三哥」、「大嬸婆」、「花小妹」這兜漫畫人物作者个廬山真面目，強強忍等轉苗栗陪家娘共度母親節个慣俗，決定當日去「剝皮寮」過願。當早就尋好位仔，還迎接劉大師大駕──哇！還孤陋寡聞喔！原來劉大師生著一門高大、緣投魁武，根本無係自家愐个武頓武頓樣仔，正經係無常識，也愛輒看電視啊！
大師一登場，就不同凡響──中氣十足、聲如洪鐘。佢講自己書讀無多，因爭讀小學時一領著課本，歸本書(頁)就愛孝敬阿公，阿公用來捲菸餺；2歲就上小學（阿姐背等去上學）咧；還吮過百過零儕奶哀个奶水。
係講拼戇力 不如愐主意
佢細人時節歇在新竹縣橫山鄉大山背，窮鄉僻壤荒山野地乜出仔恁樣仁心仁術有200零種發明專利个天才！佢有4姐妹5兄弟，還吂入國民小學，大約5、6歲該央時，厥爸摎佢講：「屋下無吃閒飯个人」，就牽一條牛仔分佢掌。頭先，牛仔會欺負細人仔，細鬼仔分大牛牯捩著轉，跌著鼻茫眼花歸身係傷，噭啼啼仔轉屋同阿爸使妮，厥爸見佢摎牛仔跌忒咧，先賞佢三巴掌嫲正講，「無好摎牛牯比力氣，愛摎佢比智慧」，「你自家去想，愛仰般正好！」丟咧兩句話分還不知人我个徠仔，結果滿腹委屈个細劉興欽捽燥目汁了後，定定仔愐仔愐，續分佢想著一隻好妙計（可參考小學課本），透過實驗，果不其然，大牛牯就分細神童制服著乖乖乖，也毋敢再作怪咧！
這係頭一擺細劉興欽食著動腦筋个甜頭，了後續等「食髓知味」，終其一生到這站仔，既經77歲咧，厥妙方點仔源源毋斷，早就樹立仔厥「國寶級」个不凡身價。目前佢兩公婆歇在淡水細坪頂个高級別墅，朝晨讀書、下晝種菜，食毋忒个青菜，在社區設置一隻無人看顧个擺攤仔，名仔安著「良心菜攤」，寫兩行標語「各盡所能」、「各取所需」，乜還有一息仔順手牽羊無付錢个「小人」，佢再貼一行字：「這裡沒有監視器，只有上帝的望眼鏡」，自此天下太平。這就係佢講个，堵著問題，毋使發譴，愛動動腦筋正好！這攤仔還順續仔發展變「跳蚤市場」，造福外勞同一般人喔。
「大山背國民小學」時節，全校共兩班，1~３年級生合著一班上課，校長還愛學生仔掌牛，係無啊，當多細孲仔就會無書好讀哦！（ 劉 先生還想愛拍電影，片名安著《掌牛校長》來感謝校長个恩情哩。）恁多同學共下掌牛上學，逐朝晨、下晝愛經過20大零條板仔橋，牛仔毋敢過板橋，佢將泥粉鋪在板橋上，騙牛過橋，泥越放越少，到後尾續毋使鋪泥，牛仔也做得輕鬆過板橋唷！（現在馬戲團訓練老虎走鋼索者要拜劉興欽為祖師爺哩！）故所，從細佢堵著困難，就愛自家想辦法解決，這乜係厥爸教佢个。
童年係吮奶達人 大時為發明大王
「做麼个講吮過百過儕奶哀个奶水？」佢緩緩仔講起該央時个情況：
阿公種茶，請隔壁鄰舍个大姑小姐來手採茶，其中乜有掛嫩子个阿姆，所有嬰兒仔放在厥屋下，總下交分阿婆同細劉興欽渡，8歲个佢負責揹嬰兒仔上山分哀仔餵奶，係講若婆既經餵嬰兒仔食過米麩咧，該嬰兒仔食飽咧，就無肯吮厥哀仔个奶，做哀仔个奶漲痛當干苦恁苦，高不將該兜婦人家就喊佢這隻大號个嬰兒仔代理吮奶──該央時「吸奶器」還吂問世，無知到包尾，這產品係無係佢發明个？──故所，佢儼然變成當地个「吮奶達人」，到後背係講上家下屋掛嫩子个婦人家，有奶漲痛著堵毋著个，佢隨傳隨到「服務到家」，一直吮到讀初中咧正「斷奶」，這也係一件服務鄉里个好人好事哩！哈哈！原來啊佢係吸收百家營養精華，正成就咧佢特聰明个腦筋啊！
「莫做缺德事」 終身毋敢忘
從細咧佢就動腦動慣咧哩，（講正經咧佢有比人較大粒个頭林）比論講，厥公在較清閒个時節，會編草鞋來賣，佢為著愛加賣兜仔，就在草鞋底神不知鬼不覺偷偷仔劃一刀，草鞋就會提早報銷，恁樣續等生意會較好，無幾多時厥歪計就分阿公發現咧，佢分厥公刻臭頭刻著佢喊毋敢，也分厥公打著當悿恁悿，阿公用異嚴肅个口氣同佢講：「缺德个事情，千萬做毋得」，從這開始佢一生人記得阿公个教示，係講到包尾，佢「專利(著作)等身」獲利豐湧，係堵著有違反道德良知个微微末末，「天人交戰」了後，佢寧可毋愛分該發明著个東西上市，也毋愛賺「烏心錢」。佢正經係一位有守有為个「硬頸」客家人！
飲水知思源 勿忘祖宗言
退休了後，佢移民美國，在僑居地創辦「大嬸婆創意學校」，免 費 教授華文摎客家話。還有世界華人運動會前年起，用阿三哥同大嬸婆做標誌，佢免費授權做公益。佢講台灣人無曉得痛惜摎打造本土个英雄人物，尤其文化打造產業經營盡值得當局注重个。中國該片建造咧59座別墅，來招徠台灣文化藝術人士，蔡智忠同朱德庸已經分佢兜「挖角」過去咧哩！
創意加品牌 發明定好賺
講著10年前，佢協助橫山鄉公所打造內灣成為觀光景點，佢做盡無私貢獻「大嬸婆」个品牌，愛鄉也愛土个心意感動著異多人。
張淑芬小姐「桐花出版社」出版个12冊「客語讀本」肚項个全部插圖，一抹煞係 劉 博士免費提供咧，她阿腦，係 劉 博士犧牲奉獻个，關係著客語文化个傳承。五月份各校選用教科書个時節，敬請大自家選用「桐花版」个。頭一擺認識了這位學老鄉親，聽佢講佢從細歇在客家莊，所以從頭到尾就認同客家文化，佢乜係盡分人尊敬个現代奇特細阿妹哩！
留言列表
