阿芳心曲

彭欽清教授指導

北市客語教師協會「客家文章大家寫」2010/5/4下晝2:00~5:00

這系列个研習，從2010/3/24開始，11月正結束。

第一擺打頭陣个就係 彭教授。該日2、3點鐘个演講，初次見著赫赫有名个 彭 先生，佢詼諧、幽默，用盡初淺个話語同想愛學習寫客家文章个學生仔分別說明。「客家寫作經驗談」，聽著昏昏哆哆（如痴如醉），續等走去基隆 從謝杰雄 先生學習「客語師資培訓72小時研習」，故所，這該過月期中，當煞猛學客語基本个功夫(特別四月底乜拿著一張「語言類」个薪傳師証書，這正係責任个開始。)

這駁仔，自家異有朗讀過客語文章，也有寫過客語文章，有學習客家語文个經驗，「學習正知不足」，真經知著自家無曉得个特多。

今晡下晝，理事長安排古耀錦、湯月麗、林福蘭三位先生發表文章，了後請 彭教授指導。「大師一出手，就知有抑無」，佢講：「批論毋好特嚴，特『嚴』(釅)食著會醉」，「拜佛毋會，相佛真會」，呵呵!佢緩緩仔「 四兩 擘千金」續等講：「雖然係講『我手寫我口』，毋過，講个話語寫做文章，定著愛經過整理。」

作文愛有「主題」，一般人寫文章，通體都在頭、尾放主題，係捉無著主題，寫來寫去偏離主題──黃鶴一去不復返，寫到特複雜，讀者跈無著，該你寫个文章，普普仔人就罅無底，愛仰結煞正好?

寫作者→讀者一般原則係：講（寫）【編碼】→聽（讀）【解碼】

寫作儕愛用麼个符號來編碼，全由自家做主，總係你愛寫出分讀者感動个起承轉合。用字愛定疊，標點乜愛精準；最重要个愛教學生仔「段落」安排个寫法──台灣作文教學異欠缺這一環，一下碼就愛學生子寫歸篇，愛定定仔教同學啊！

還係講，寫忒後，做毋得緊衝衝仔交出，愛一遍一遍朗讀分自家聽，聲調高低有無？係無，愛修，愛整。文章定著愛耐讀个，正係好文章。

總係講，經過該零月个自我經驗，對寫客家文章有略略仔趣味摎一息仔認識，這做下愛感謝客語協會諸多先生指導，特別感恩  彭教授，因爭兩擺个因緣，分脫體多个感受，續等乜愛拿出行動力「從做中學」。