阿芳心曲

因爭十八歲就離開屋下去高雄讀大學，同哀仔共下無幾多時；又細人時節不知人我，總係「爺哀惜子長江水」，阿姆對个照顧，做得講係「子女想娘擔竿長」，佢既經過身七年零咧，今生人報答毋起咧哩！

吾爺仔在讀大學前一年就過身，吾姆四十二歲起就起畜四隻細孲仔个擔頭，該央時盡細个老弟正吂十歲，做盡讀書時正愛大用錢个時期，目汁還吂捽燥，跈等就愛煩勞細孲仔个註冊費，續等疲爬疙蹶、千辛萬苦正摎細人仔渡大──這期間，佢做保姆同親友渡細人，還攣遮仔做家庭手工，就恁樣靠一雙手教養四隻細孲仔，做盡有大學畢業。

毋過，就係咬薑啜醋、攪糖摎飯，毋盼得買菜傍，硬撚等喉嗹胲死省死儉，無照顧自家个康健，再講恁年輕就死老公，心情仰般會好？故所，正著著糖尿病這症頭，為著省兩點錢， 毋分 先生看，一日圖過一日仔，病症越來越嚴重，就像「貓仔扡粢粑──難摝爪 」哦！

等著細人仔成家立業，做得有孝哀仔个時節，續這也毋好食，該也毋好食，逐擺多食一息仔好料，後生仔个「做毋得食恁多，愛節約，毋好好食就盡命牯齕啊！」這兜毋好聽个話語就在耳公脣響起，佢當閼，就講：「頭擺愛食毋錢，這下有錢做得食，續做毋得食，做人何嘛死苦恁辛苦！食死較贏餓死哦！」這話聽到子女耳公項，兜總係無結無煞，這乜造成親子間難解个衝突，還有佢自愐厥自家係當歪命个人。

對吾姆身項學著「無認輸」个硬頸精神；還有省儉个習慣，佢輒常掛在嘴邊个一句話：「毋會賺錢，毋過，會省錢；少花一個銀，就係多賺一個銀。」故所，吾爺過身了，佢無缺薄四姊妹个學費，佢盡命牯繳子弟讀書，四姊妹正有安樂日仔好過；係講今晡日做得無煩無勞，做盡愛感謝吾姆。

在母親節个前夕，在心肝肚大聲喊：「阿姆，最愛你！」祝福

你在天堂同阿爸日日好過日