阿芳心曲

擐燈籠介火燄蟲

[譯]:提燈籠的螢火蟲

張捷明 客語文童話

正月十五鬧花燈，火燄蟲無閒淬扠打扮到靚靚，暗晡夜佢愛去桐花森林，參加一年一擺介燈籠比賽。火燄蟲介手路盡慶，做介燈籠隻隻都恁靚，年年比賽，佢係謙讓座第二，定著無人敢講自家打頭名。

[譯]:正月十五鬧花燈，螢火蟲忙裡忙外打扮得漂漂亮亮，晚上他要去桐花森林，參加一年一度的燈籠比賽。螢火蟲的技術最厲害，做的燈籠每個都這麼漂亮，年年比賽，他要是謙虛第二，一定沒人敢講自己第一名。

紅紅介日頭落西山，天色漸漸暗，天邊五色雲，在火燄蟲介心中，畫(vak)出一幅靚靚介畫(fa)，佢看等手中該隻細燈籠，想著天邊較靚也會變暗夜，佢起一隻大願，下二擺定著愛做一隻遮天介大燈籠，分大家一暗晡就做得看靚。

[譯]:紅紅的太陽落西山，天色漸漸暗，天邊五色雲，在螢火蟲的心中，畫出一幅漂亮的畫，他看著手中那個小燈籠，想到天邊再漂亮也會變黑夜，他立一個大願望，下次一定要做一隻遮天的大燈籠，給大家一整晚都可以欣賞。

火燄蟲擐等細燈籠開始出發，佢愛飛過魚塘、飛過草排，飛過河壩。路項堵著魚仔，魚仔當欣羨：又堵著虐毛蟲，虐毛蟲忍毋歇讚嘆；來到河壩唇，河壩水哩哩囉囉，石跳仔彎彎斡斡，暗夜中看著阿狗哥揹等厥賴仔，講賴仔發燒毋退，透夜愛去醫生館看先生，毋過頭前路恁暗，腳下水危險，愛一步一步細義kiam，係無，跌落水肚命會冷。火燄蟲聽著無下二句，擐等細燈籠飛到頭前行，照亮一步一跳介石跳仔，分阿狗哥細心細義安全過河壩。

[譯]:螢火蟲提著小燈籠開始出發，他要飛過池塘、飛過草原，飛過河流。路上遇到魚，魚非常羨慕：又遇到毛毛蟲，毛毛蟲忍不住讚嘆；來到河邊，河水潺潺而流，水面上的墊腳石這一塊那一塊，暗夜中看到阿狗哥揹著他的兒子，說是兒子發燒不退，連夜要去醫院看醫生，可是前頭路這麼暗，腳下河水又危險，要一步一步小心跨，要不然，跌落水中命會沒。螢火蟲聽到沒推遲，提著小燈籠飛到前頭走，照亮一步一跳的墊腳石，讓阿狗哥小心安全過河。

等來到比賽介油桐花森林，花燈既經比賽完，火燄蟲擐等細燈籠，試著失去得獎機會當打爽。毋過，佢又想起厥公介話：世界當大當闊，愛大家都恁慶正生趣。故所，佢看著今年第一名介花燈，又乜恁靚。

[譯]:等來到比賽的油桐花森林，花燈已經比賽完，螢火蟲提著小燈籠，覺得失去得獎機會好可惜。可是，他又想起他祖父的話：世界很寬很大，要大家都很厲害才有趣。所以，他看到今年第一名的花燈，也這麼漂亮。

遮天燈籠可能無人做得著，照三吋闊介細燈籠只愛有愛心，共樣恁光明恁靚。

[譯]:遮天燈籠可能沒人做得到，照三吋寬的小燈籠只要有愛心，一樣這麼光明這麼漂亮。

張捷明 2010 2 28 正月半桃園看花燈

[譯]:張捷明 2010 2 28 元宵節桃園看花燈