close
老人,三歲子。
屋下个老人家最希望自家个大細同佢譫譫哆哆打嘴鼓。
這滿,吾家娘又好写写仔,恢復元氣了!也較接受了
吾家官一直住院个事實了。
吾家官可能愛待在醫院到老,
今晡日轉到沙鹿光田醫院呼吸病房洗腎常照中心。
總係子女欠佢个吂滿,佢可能無恁胲做得圓滿。
人个生死,係早就注定好个。
親像吾妹家个新叔,在北榮手術後,
雖然三日就做得下床,毋過包尾受到感染,
入加護病房用葉克膜(體外心臟)&
三管(鼻胃管、呼吸管、導尿管)維持了兩禮拜,
還無較好。仰結煞?經過主治先生分析,
吾叔姆同子女參詳,做了[拔管]个準備。
家屬已有萬全个心理準備。
雖然[不捨],乜愛學習[放下],係無,
急救了圓身,佢共樣無法度企起來如常生活啊!
恁仰分佢个魂魄受苦,不如放下今生,
早兜仔轉天家去,從頭正來做一個新生命。
死,係另一個生个開始,敢毋係?
呵!人生啊人生!詏命毋贏,
做麼个吾爸42歲就轉回天家了呢?
還有且姆婆曾滿妹百歲婆今年101歲,
前一站仔正入署苗醫院加護病房兩禮拜醫因為敗血症,
醫生無看好厥个狀況下,佢既經過了關,
這下共樣在屋下,由外勞掌等佢。
佢淨橫在眠床項,比吾家官較好一息仔,
佢毋係三管病人,還有意識;
毋過共樣毋會跋起來自由行動。
我做定派了,毋使多愐,由在佢去,
[安時處順,謂之懸解]。
儘採上帝公愛出麼个功課來分我練習,
我就認真煞猛來練習ing。
文章標籤
全站熱搜
留言列表