阿芳心曲

逐禮拜三同拜四就係我最快樂个日仔。

昨晡日12/12(四)打早就去公園做達摩易筋功，我當煞猛盡命牯停動，無一下半仔就歸身燒熝熝、還出汗，成時汗答答答跌，歸面洗一遍，這係天然个面油，分你好氣色。自從我立志朝晨愛運動，三隻月以來身體改善當多，我定著愛繼續[活動]下去。

會做忒時節，吾同事好朋友Call我，去冷水坑行行兼洗湯，這難得个機會，顧不得10:00起有一場[北市婦女寫作協會]个講演愛聽，先去再過講。

恩兩儕先[摩斯漢堡] 食了朝，行了半點零鐘路，就入去[冷水坑]女湯，今晡日冷咻咻，人無已多，毋過接等入來个大姑小姊，也同細細仔个水池擠淰淰，因爭這係開放毋使錢个原因。

這溫泉池中有各形各樣个婦人家圓身，任你欣賞。大體就係上了年紀个老大阿姊、阿桑，葫蘆型个、阿不多(不倒翁)型个，正三角型，還有粒粒碣碣不規則型个有較多，想愛尋一個標準模特兒身裝个，根本尋無著，你用膝頭愐就知，親像吾妹仔這兜後生細妹仔，無可能會來這位所拋頭露面啊！毋過，對一個個打摺又變型个圓身頂項，掛頂一對對千奇百樣个奶姑，憔憔皺皺个頸莖頂高个無春風當皺痕个面頰卵看起來，做盡乜光華華仔看起來聖潔又真靚，這歸身个皺痕就係歲月在該圓身留下來个痕跡，何必花大錢去[脈衝光]、[雷射除斑]、[拉皮]、[矽膠填充]整形美容呢？

成時，在這短短个15分至20分鐘之間，我恬恬聽佢兜一二儕大聲胲分享厥生活个經驗，試到這兜大姊、阿桑做下係人間瑰寶，佢兜將一生人奉獻分家庭，到這滿行路強強就會行無正个時節，日日坐免費公車上山來洗身，自家照顧自家，毋使煩勞大細。分我非常佩服，我老了，乜愛共樣[自立自強]。