2014-01-08(三)農曆臘八 朝晨好天時 下晝變天落大雨
朝晨去陽明山花卉實驗中心欣賞茶花。
臨晝邊仔咇哩啪啦落一場當大个雨,續等天時就越來越寒,
我去長庚家醫科看吾康健个守護者------林教授。
佢可能這站仔有較煩惱,感覺佢有較胖大兜仔------
運動無罅樣仔。
自從,兩三年前同佢結緣以後,吾血糖个問題暫時交畀處理。
乜排定拜五朝晨去[乳姑攝影],順續抽血檢查。
了後,我定定仔用行轉屋下,行到金石堂書店停跎一下,
看著烏天暗地恁得人驚-------親像天公爺愛拚大水了!
害我煞煞坐兩站个公車轉屋下,正4:00點鐘邊仔,
歸天暗暗像臨暗仔,一直到6:00邊仔又正落雨毛仔,
毋過,朝晨燒暖既經變到砉冷了!這滿个天時已搞怪,
分人按算毋得。
到7:00學生仔佩樺打電話來:
[可能會遲到15分鐘],佢前一暗晡正同來[確定]過,
我歸日就記得,就這下肚屎枵了,自家煮了菜食起來了。
堵好妹仔下班,佢笑我:[癡呆症提前來!]
【烹小鮮火鍋】巷仔底肚个細店仔,人客毋多,正經
當理想講話个位所。
佩樺國中畢業三兄妹就移民去米國讀書,柏克萊數學系畢業,這滿愛準備四月仔考研究所,厥目標係[做精算師]。阿愷北科大研一;祐麟係射箭國手;小紀高一就投筆從戎做[女兵],既經退伍食頭路咧;小連大學肄業做專櫃,頭家愛派佢去上海開發新店。佢兜做下變到恁靚恁斯文,害我目珠金金看到嘴擘擘。
講起會十年前佢兜个news,我已敗勢!我威權高壓管理,佢兜通棚恁乖毋會反抗,係這下早就分人告到該片恁遠去了。
佢兜係我最包尾个導師班學生仔,三年日日共下生活,親像共屋下人。
今暗晡分佢兜請,我領便食。
恁仔細
承蒙你
留言列表