阿芳心曲

後生遊野野毋增志，老了正來學吹笛。

從頭學起，加減有兜辛苦，講著食苦，就當佢做食補，實際上也無已辛苦啦!~~~

我恁樣無頭䌈(頭緒)講，你可能抓(saˊ)無。到底我仰般有這道嘆?請聽我來講分明:

我一生人讀國文、教國文，天生就食這行飯。這滿退了休，正來學習[客家語]，還想愛繼續來企在學校教室个講台項，同細人仔綹麵線互相做交流。故所，就愛擔輸贏、皮弓較緪兜仔接受認證同受訓，前者[客語能力中高級認證]一年做得考一種腔調，我98年考過[四縣腔]，就以此自滿，無像好多[北市客語教師協會]个先進朋友，一儕人基本四縣、海陸兩腔調拿著證書，連饒平、大埔、詔安乜抓揫揫。後者个受訓，逐年教育局在避暑期間會用心安排當多[鄉土母語教學支援工作人員]增能研習，所以一放假，就毋閒直掣上課去，這央時各各小學又放出盡多招考支援先生个消息，有志一同个夥伴這兜，做盡已無閒遞上履歷、參加試教、口試，為著愛尋一個離住家較近个國小來[傳承客家語]。

我這禮拜就搣這恁樣个事頭，包尾皇天不負吾个用心，分我如願尋著理想个位所來繼續吾个教學工作。頭擺，讀師範，一路哩來工作派用，頭路毋使參加徵試；這下，愛參加評比、同人較量，心情天差地別大無相同。

該日，口試个時節，同學老話先生分別兩隔壁試場，共下在校史室歇睏等抽籤唱名入場，接受三個委員提問。學老先生五儕愛取四儕，有一位姓許，83歲个精通國、台、客、日語，鐵道部調度室主任退休个先生，看起來正七十空歲，身體砸磳、精神飽滿、行動溜掠、斯文有禮，一息仔就無老相，佢除忒附近這兩所國小外，還在四位社團、教會教[日本話]，佩服厥个生活能力摎活力熱情。希望同佢多學習[不老、樂活、悠活]个秘訣。

我當歡喜又同成德好搭檔伙伴孟芳共下在這學校教客家話。這下，我會定疊慢慢來、毋使緊性，緩緩仔、和和仔來同小朋友結善緣，同時乜種福田。

下背係河濱花園个【凌霄花】，種有三、四年了，今年這滿正看著開花。教客家話也共樣毋使急衝衝仔，時間到了自然開花分你看。

恁仔細!承蒙你!