阿芳心曲

正開始尞避暑，7月1~3日，8~10日，總下6日个【北市國小、幼兒園客家語師資培訓】，我歡喜參加。

感覺這擺[台北市立教育大學]承辦个，已有特色。聘請个教授講師做盡恁湛斗，逐位專家學者做下摎佢學有專精个學問[傾囊相授]，這兜有報名毋使繳學費个學員確實已幸運摎幸福。

第一天:7/1(一)

朝晨~仁愛國小張文宏校長演講【客家文化在台北】。

張校長係吾初中个同學，45年前佢高天天、瘦挾挾仔个樣相，同這下恁粗滿高大个身裝嶄然無相同。印象底肚，佢文優內向，雖然男女共班，我毋識同佢講過話；仰會知佢[離別幾十年，會講又會唱]，中氣十足，講演生趣生動；唱起各式歌曲，聲如洪鐘、餘音繞梁。

下課了，佢同我講佢兩公婆都吂退休，尤其厥餔娘熱愛教學工作。還好哦!恭喜[樂在工作]。佢還比我較慶，降有三個大細。

下晝~劉醇鑫教授講題係【客家語言摎文化在教學个應用】乜已好聽。毋過，佢略略仔提著[打新丁，同脫桊共樣係客家个成年禮，細倈仔滿十六歲做个]，敢係?

吾[認知]係:細倈仔出世後，對歲邊仔之前，就愛打新丁粄拜阿公婆，同祖先敬報屋下添男丁了!

羅烈師教授係交大客語學院个先生，佢講【多元文化同欣賞客家】，佢紹介《四月望雨》這齣舊年公演29場个鄧雨賢)个客家故事，佢安鄧雨賢係[隱形个客家人]，這對鍾肇政杜撰个《望春風》小說改編个舞台戲劇，當然同實際不符。鄧先生个孫嫂華媛老師平平也係學員，下了課，佢同羅教授溝通了半點鐘，講厥公同女歌手个愛戀故事純屬虛構。羅先生傳達一個觀念——欣賞客家，無定著就愛成為客家人。故所，比論講交大客家文化學院个畢業生，只要擁有客家素養，能用客家為例證，做得摎客家素養表現在厥專業領域之中就好。(客家素養Hakka Literacy，指个係對客家知識摎情感个同理心&同情心。)

假使《四月望雨》拿著客委會補助，全講客家話、唱客家歌曲，可能無恁多人去欣賞，也無可能感動著恁多人。

羅教授講，客家有名个詩人——杜潘芳格、張芳慈、邱一帆、黃子堯這兜作品，做盡做得當做教材，來教育後代子弟。

第二天:7/2(二)

朝晨~古國順教授講【客家禮俗】同生活非常密切。佢民國28年出世，雖然係滿子，麼个田事就會做。正同禾稈平高時節，就會ten㧡禾稈，掌牛掌到20空歲，蒔田、挲草一抹煞會做。逐日跈厥爸做到兩頭烏，牽牛仔陂塘食草，等水牛牯大氣敨勻了正轉屋；屋下耕个兩甲零田个田脣草，佢總貿做揫揫；還愛剪禾稈肥田最驚事頭無做好，分阿爸賞食竹修粄。暗晡時，三兄弟共一盞火背書，背熟絡正做得睡目，佢語重心長講，這滿細人仔欠缺「勞動教育」；尤其灶頭鑊尾全全毋會做，細妹人到了行大嫁時節，還麼个都毋會做。

佢還講佢小六開始就會做對仔寫春聯，提起吾叔 陳運棟每年「新春開筆」寫詩，新春元旦開大筆，萬事皆大吉。

 佢講佢5.6歲開始，厥爸就愛佢兜背24節氣名稱。經過  古先生說明，我正知俚「農民曆」係陰陽合曆:

1.24節氣係跈等日頭行个記時。

2.舊(農)曆係跈等月光行个記日。

續等【客家美食DIY】係[客粄印象美食教學團隊]林仁登&曾玉琴兩公婆領隊，實作、分享。製作艾粄鹹、甜各一&仙草凍。

下晝~市教大[學習與媒材設計學系]葉興華講【教師个課程設計】深入淺出，引人入勝。

東東(湯運煥)老師主講【近代客家流行音樂个發展】正經寓教於樂，大家跈佢唱[客家本色]唱到心花開。

唱歌仔係攸關荷爾蒙个問題，老山歌牽聲係為著避免音聲混淆，這下因時因地制宜。

第三天:7/3(三)

朝晨~謝職全老師(謝杰雄先生个阿叔)講【客語數位學習資源運用】

下晝~駱師傅(駱進漢老師)教授【認識客家美食】傳授幾招客家私房菜个食譜，等我有閒來實際操作後，正來一一分享。

駱師傅熱情分享，時間超過20分鐘，故所

何石松教授湛斗个分享【國客語對應】相對時間被壓迫減少20分，加上下晝場所悶熱、冷氣故障，當打爽。

何教授引經據典說明［客語詞彙个會通］，我聽到如癡如醉、昏哆昏哆。

總講：這三日［充電］，當有價值，還同恁多新朋舊友相識打胖嘴，斷真係難能可貴个機會。

７／４本成既經報了名，大理國小兩日研習，一來路途遙遠，二來身心盡悿，三來還有事頭——歸日［文學客家］校稿，八、九點鐘下來圓身斯屙悿屎，毋過心情已快樂，因爭這係我个趣味啊！

恁相惜

承蒙你

ＰＳ：今晡臨暗仔愛坐吾老弟心臼个便車轉頭份妹家，四姊弟會面，從過年到這，正有這一擺，我期待盼望等！