這站仔，較注重自家个活動，毋想停動轉通霄看家娘，
只有千萬拜託吾老公戴在通霄摎老哀仔做伴。
今晡日20140727(日)，農曆七月初一。
愛淨果拜阿公婆；
還過正過身吂兩個月个家官愛煮碗拜三餐。
[前世無修，倈仔準心臼]，這一抹煞拜喏事頭吾老公貌揫揫，
我盡感謝吾老公同吾家娘个包容，分我充分自由做自家。
拜五暗晡，黃金客語讀書會，雖然正五儕人參加定定，
做得同好友暢樂談哆，互相請教，實在有值~~~
老友个相濡以沫，係人生燒暖个重要配備。
昨餔下晝，去客家藝文中心，
開下星期始兩梯次[北市國小夏令營]行前會議了後，
摎好朋友阿仲、阿珊坐尞打嘴鼓一下~~~怕有兩點鐘久，
各儕講這兩三年無閒麼个，還交換客語教學个心得。
阿仲既經有中醫碩士學位，
今年中央大學客語語言研究碩士論文口試通過咧，
論文修整中，還慶哦!
還有佢係全台灣難得客家語[四海大平安]五腔調中高級認證
全下通過个奇才。實在服佢，佩服到地泥頂項貼到平平平!
佢道嘆，就較毋會賺錢定定。
嗨!講著錢就傷感情，
老老古人言:[生死有命，富貴在天]。又講:
[大富在天，細富由勤儉]。
錢銀多少無比值，較多啊人也無滿足；
毋過，[康健比錢銀第一愛注重]，
這道理人人儕儕就恁知，關鍵時節還係[金錢忘不了]啊!
今晡朝晨，打早行去基隆河左岸河濱公園恩个花園，
大半年無整理个[荒草埔]草淰生塞，一息就毋餳人哩!
我旁脣看看啊，同自家影仔做朋友。
堵著東引阿媽，佢逐朝晨就有看佢著个細圳溝，
裡背畜有巴掌嫲大个福壽魚。
[犀牛榕樹]大樹脣口，
金將軍在挨手風琴唱歌仔。
這做盡係吾个好朋友，這滿仔當久無看著，
故所一接目，親膩膩仔!
最歡喜个一件事，就係同妹仔在巷仔口共下食朝。
毋敢翕厥正面，尊重厥个[隱私]，
我無愛再過做恁得人惱个哀仔咧!
分你揣:
這一份英式培根炒蛋、黃金沙拉、薯條、紅茶套餐175+
單點法式蜂糖厚片吐司60，總下幾多錢?
235个銀，貴無?無貴!
親子共餐值萬金。
恁仔細
承蒙你
留言列表
