2017/12/25(一)
上禮拜好天時幾下日，拜五12/22冬節該朝晨上班前正拿被骨樓頂曬，下晝緊拚拚仔三個間房个被骨做盡拿上去曬。感覺手骨比舊年較有力，有注重運動煞猛做復健有爭差，心肝肚異歡喜。
12/23打早吂五點就䟘起來洗被單，洗衫機連洗兩擺，大細總共5領。吂知3樓个郝太太比𠊎先一步，位仔伸著4股1股，佢好心又徙8股1股讓分𠊎曬，層層踏踏搭上鍊仔再過用夾仔夾好，就出門同同事共下食朝。這日主要活動係10:00~17:00客家筆會年度論文發表大會。
下晝吂5點拚轉屋下收被單，係再過一下仔，日頭落山被單還吂收好就會轉潤忒，該就沒採工咧!吂入被骨好勢，老周載家娘、妹仔轉來咧，本成出門前留紙條交代愛佢兜𢯭收被單，吂知老周乜在通霄搣曬被骨事頭，兩公婆心連心共樣顧家愛家，寒天个日頭特別珍貴啊!
拜日野虎登山隊有行程，毋過𠊎無力去咧，雖然老周鼓勵𠊎自家跈去。臨晝仔家娘去東湖康寧醫院看息嫲仔，吾小郎叔个細心臼12/20[剖復]又降一個妹仔。家娘胃口差食量細，人又細意，𠊎變毋出佢好食个，三餐料理有兜仔壓力。老周緊安慰𠊎，講:「無相干，佢在通霄乜恁樣。」
今晡朝晨10:00邊仔下南轉去咧。又伸著𠊎一儕「老祖媽」在屋下，安然自在還好呢。去全聯社領著咧杓仔，足足慢咧個零月正著手个杓仔金積唧亮，還寶貴哪!下晝做咧一大鑊肉圓(獅子頭)烳白菜，味緒當湛，分享勤姊一息仔，又同佢討「豆仔藷」(涼署)，前前後後拿咧9隻，厥老妹台南種个，還有麻油也自家生產个。
昨暗晡平安夜，今晡日「行憲紀念日」無放尞，電視報歸年肚生日最少人个就係12/25&1/1，生趣。
******************************************************************************
拍攝時間:2017/12/23 9:00~9:20
地點:台北士林官邸公園
留言列表
