阿芳心曲

靚靚个韭蘭花

開在公園裡肚

台灣係寶島

四季花常開

想起拜日朝晨在通霄，賣菜个阿嫂騎等自行車來到屋面前，拿籃肚兩隻柚仔，講:一隻10箍，兩粒20，還有幼幼細細支个蔥仔8抓，1抓10箍，總買60就好，𠊎總貿下來，佢另外送兩粒香水檸檬(一粒10箍)，看佢清空菜藍，輕鬆轉屋下，講妹仔會轉外家來，𠊎也當歡喜。買著恁多个蔥仔，送分隔壁鄰舍、也還帶轉台北來。

拜一朝晨，烳咧一鑊爌肉分做四份，有兜冷凍起來；買咧2盒幼絞瘦肉，大量个蔥白、一息仔薑嫲，10多隻荸齊......撚咧10過粒肉丸[獅子頭]滷大白菜。恁樣先做便，拜四暗晡黃金客語讀書會輪著𠊎做爐主，愛提供暗餐个時節，就毋會慌張；又乜做得分享分好友敦親睦鄰，朋友說𠊎手路好，料理好食，𠊎也暢到尾仃仃仔。

這兩日好天時，日頭恁烈，嗄目金金仔看佢過去，懶停動洗被單曬被骨，成時悿也毋使勉強自家。現下學生仔學習鄉土語言个趣味低，課堂項[走動式教學]免不了當食力，一朝晨四節課下來，下晝就需要睡一覺目，故所無恁大氣力來趕緊洗曬被骨啊!

今晡日舊曆10月12，拜六10月半又到咧，真無想愛轉老屋去拜喏，毋過......