昨晡電視報導有一對哀仔同妹仔(母女)共下去食喜酒,同新娘、新娘公根本無關係毋認識,想白齕一餐豐沛个桌席,結果分機靈个新娘公捉著,報警處理。這哀仔在警察局接受偵訊時,還面皮賁賁punˊ大喊:[你們不要欺壓弱勢]。
阿姆哀哟!惡人先告狀,做賊仔个喊捉賊仔,這係麼个世代?自家好手好腳毋肯煞猛打拚,一心就想愛[白吃白喝],仰會有這種人?這社會發病个人斯當多啊!佢兩子哀還白齕當多麵店、水餃店......連屋稅也賒數,實在有見笑。
貧富懸殊年視年加嚴重,[赤腳打鹿,著鞋食肉]社會現象个不公,政府有責任來改善个,莫到[官逼民反]該斯當無結煞喔。
話講轉來,40年前我正畢業在大溪教書該央時,有一擺吾三舅姆喊我代表佢兩公婆去中壢食酒,厥个鄰舍討心臼,因為佢兜開一坎雜貨店做生理無閒,包咧紅包吩咐我尋一個伴共下去參加喜宴,結果新娘、新娘公敬酒个時節,人家問起,害我面紅濟炸毋知愛仰般講,盡敗勢過恁敗勢,就這一擺定定,下二擺打死我就毋會再過想愛去參加生份人个喜宴咧!
★**************★**************★*************★
松葉牡丹
花開富貴
四季平安
文章標籤
全站熱搜