阿芳心曲

下星期係小朋友个段考

逐年生各班个班導師

無閒直掣同佢兜復習模擬考

大半學生仔面結結仔無笑面

昨晡日六年生个兩堂課

盡量犧牲色相親像做撮把戲弄分佢兜笑

感覺分人歡喜分人快樂係吾个本等

今晡日前兩堂課三年生个

有食著阿芳姊現做个韓國海苔皮包甜粄煎

一儕一垤食到會尋尾

細猴仔嘴碼好，做盡說阿芳姊手藝好

𠊎乜暢到尾仃仃

包尾第三節一年生來上課

堵著天公𥍉爧、打雷公、落雨

同佢兜分享[春雨]

佢兜嗄背起國語課本个<春雨>个新詩課文

第一課到第四課全係同春天有關个文章

直直唸到第八課、第九課

佢兜唸國語

𠊎用客語深情翻譯唸過一遍

親像同佢兜復習課文兼教客語

恁樣好搞个事頭

大人細子搞到天轉笠嫲花

第四節四年生个赴毋掣上課個學生仔

同我講个理由係分先生罰寫國語課本

蘇軾<題西林寺>:

[橫看成嶺側成峰

遠近高低各不同

不識廬山真面目

只緣身在此山中]

講會唸毋會寫

寫錯當多字

共樣教佢兜用客語朗讀宋詩

佢兜乜歡喜壢天

恁好搞个頭路實在毋盼得擲忒啊

有朋友建議為著自家个退休快樂

最好毋好接恁多課

其實，佢毋知吾生活正經个快樂

就係在講臺項同細人仔談哆

學生仔也係教𠊎生活个先生啊

恁仔細

承蒙大家