阿芳心曲

外家門前日日春
啾紅啾紅鬧洋洋
停跎一下遽遽歸
歸心似箭無心性
屋下妹仔正轉來
手足情深兩子哀
紅花笑我阿搭嫂
萬千毋當自家愛

昨晡日坐10:10台北轉運站國光號下南往頭份，共時間細老弟同林口坐上無共班个國光號，兩姊妹相約在頭份客運總站堵頭，拜託大老弟來載；還有遠在台南个老妹無法度一下飛來相會，這下吾姆既經見背15年咧，外家伸着大老弟一家人守等，四姊妹一家一務各有任務，愛相見斯無恁該。

一高過湖口塞車到新竹，頭份交流道又塞，三儕過晝正見面，先去阿棟叔屋下探看兩禮拜前騎歐多拜跌着倂仔骨同飯匙骨斷忒六支个叔姆，這下請一個臨時外勞看護，正式个印尼看護工吂到，看春枝叔姆驚驚無安生，細老弟同阿影表嫂分佢異多意見做參考。麼人乜無想愛靠人，自家做得自理自家生活大細事，係最幸福个啊!

在棟叔屋下食一餐簡單豐沛个豬腳麵線卵，還有薑絲七層插炒鴨肉，瓠仔煮魚湯，這巴里島來个26歲細阿妹還異靈通，雖然語言無通，一教就會，真慶!

食飽晝，啉茶傍雞卵糕，幸福淰淰!厥院子肚也有油甘、辣木、楊梅(公个毋會結子)，樹葡萄這兜罕見个養生果子哟。

大老弟載𠊎去眼科定期檢查乾眼症拿連續處方，倒轉來繼續談哆，16:00邊仔，電話講苗栗縣長愛過來坐，正結束長尸胐時間，轉來水流東大老弟屋下。

大老弟有應酬愛出門食夜前，暖好什錦炒飯、羅宋湯，煮菜瓜，分𠊎兩儕過餐。想着妹仔一儕在台北，歸心似箭，兩腳一捙走到尾瀉屎，轉到台北21:00點零，在公車頂低頭滑手機，還過一站正下車，正經係愛遽顛倒慢!