阿芳心曲

台南阿蓮姊係歇在吾這棟大樓頂樓个阿婆，

佢大我10歲，降有一子三女做盡結婚了。

佢兩公婆在台南事業小成，生活豐湧¹，

後生時節也蹶山²，這下事業交分後生仔，

輒常³兩老仔打高爾夫運動。

毋過，看佢外表大箍⁴豐滿，著衫當莊頭阿婆个樣仔，

一滴都毋會聯想著佢係好額人⁵，

低調再過低調，做得恁樣形容。

厥四個子女全係留學英美个，

大个妹仔做過空中小姐，三個妹仔做盡[魔鬼身材天使面孔]。

佢來支援這樓頂个第二妹仔算係遇人不淑。

獨力渡大一對國二同小四个子女，

妹家爺哀全力接濟。

衰過⁶正得，

對厥妹仔失婚10年以來，佢犧牲了在台南个高等生活，

來台北同妹仔ten渡細人仔，搬來這位既經8年咧，

係講毋係該日佢在樓下同我相借問，

我也無機會認識這位堅強能幹个大姊。

佢邀請我去厥妹仔的頂樓豪宅坐尞一下。

緊講厥妹仔青瞑正會嫁著這浪蕩富家子，

認識吂⁷兩隻月，就講這男仔人當愛佢，

毋聽爺哀建議「愛交往久兜仔正了解性體⁸」，

強強就愛嫁分佢。

婚後跈等在銀行上班个老公戴香港四年，

這中央降有一個倈仔，轉來台北後，

有咧身項⁹，

老公又去瑞士上班3年。

婚前婚後毋知同有幾多個學老嫲¹⁰，

花天酒地輒輒大慨

在酒店連續開一罐幾下萬箍个紅酒；

嗄無錢買牛乳粉蓄細人仔。

細個妹仔對出世了無看著阿爸幾多擺。

雖然兩個子女有美國籍，

嗄無臺灣學籍，這點我無法度了解。

講兩個細人仔做毋得讀一般公立學校，

淨做得讀某中小學，

一年抑一學期愛一兩十萬學金。

天下有恁多不幸个家庭，

人靚毋當命靚!

莫怪這下恁多後生仔無愛結婚，

嫁娶著毋著个人就慘死哩哟!

注解:

1.豐湧:富裕

2.蹶山:爬山

3.輒常:經常

4.大箍:肥胖

5.好額人:有錢人

6.衰過:可憐

7.吂：尚未

8.性體:個性

9.有身項:懷孕

10.學老嫲：小三