阿芳心曲

20130823(五)

今晡日係金門823砲戰紀念日。這滿，舊曆七月十七，係「處暑」──處，止也，停止熱暑，24節氣之第16，後背還有「白露」、「秋分」，「寒露」、「霜降」，「立冬」、「小雪」，「大雪」、「冬至」，一年又盡了！今晡日起一日比一日涼爽，朝晨、暗晡天時清冷，愛著加兜衫，正毋會寒著。

新曆823也係吾棟叔个生日。今年堵好佢81大壽(滿80歲)，頭擺人70係「老」，80係「耄」，90係「耋」，客家人公婆齊，愛做出頭81，(學老人顛倒做齊頭)。

上個月7月27(六)苗栗縣政府文化觀光局在縣府第二辦公大樓五樓會議室為吾叔舉辦一場「 陳運棟 先生論文發表研討會」，歸日六位專家學者先後發表精采湛斗个演講，吾叔也針對論述場場答辯，這過程中央，分我盡多个感受同感動。(不再一一贅述)

一般來講，成功包含先天同後天，棟叔自家煞猛外，討著了好餔娘，無怨無悔全心支持佢幾十年，春枝叔姆係推動搖籃的一雙[巨擘]。

論文發表首登場个係吾造叔，陳運造，主持人 黃鼎松老師戲稱  運造阿叔係「植物人」，佢中興農教系畢業後，一生拈花惹草研究植物、著作等身，這滿有同棟叔、運昌叔共下做陳屋族譜个研究，乜當有成就。

我兩位阿叔个認真過生活个態度，分我已多个愐想同敬佩。

難不成嫁出去个妹仔，兜了別人个飯碗，就愛顧夫家大細溫飽就好，毋使發展自家个「志業趣味」？親像吾春枝叔姆，一切以陳運棟个生活做中心，放棄了自家个理想同發展。

這滿，吾家官發大病，吾叔姆就鼓勵我：「80%盡力協助賢德照顧屋下；對妹家个關心僅可20%」。原來，生活底肚，有捨正有得，心肝企仔正，毋驚外背做風搓，公婆係鬥著，萬事就OK！

欣逢阿棟叔81，恭祝

公婆恩愛透雙燭

無病無痛食到老