阿芳心曲

園裡的 野玫瑰

2013/02/19(二)年初十，水神生。

「有食無食，尞到年初十；

有賺無賺，總愛尞天穿。」

過了今晡日，做下恢復正常个作息哩!

(昨晡日係[雨水](2/4立春)，也係[天公生]。)

今晡日天時變寒，正經[春天，後哀面]。

朝晨七點零就去成德國小上客語課，

雖然整理教材、教具，有兜仔無閒；

毋過，大體感覺當好——

學生仔過了年，全部較大漢了!

二、三年生有兜「缺牙耙」个牙齒乜生齊了。

看著熟識个親像自家屋下人个當人惜个小朋友，

特有一種講毋出个親切。

為著愛鼓勵四、五年生个小朋友參加

校內客家話朗讀&歌唱比賽，

半強逼半拐騙，希望佢兜做盡去報名。

記得，第一年有三篇朗讀文章愛準備，

到時抽一篇來讀；

第二年，兩篇抽一篇；

今年，伸一篇，就準備一篇，大家來比功夫。

阿姆哀!

這表示學生仔个程度係坐落下傘——直線降下?

也係阿芳姊教學無煞猛？

莫過胚想恁多。認真做就著cog！

轉來屋下，透大氣！

喉嗹空額額ngaigˋ佇毋著（喉嚨硬是受不了)！

這央時，

初中換帖个打電話同我講，

佢著著[休葛蘭氏症]——一種乾燥症，

可能無藥好醫，

分醫生試驗用藥中。

佢話我乜愛保重自己个身體，

毋好忒過煩勞。

我毋知哪條筋無正，嗄放聲盡命牯噭，

噭到天搖地顫——

我自家也著驚，

吾老公行兼來拍拍，安慰。

包尾，一、兩點鐘，想著佢，

喉嗹空又硬起來，目汁又蔭淰歸目珠。

唉！

死生有命，強求不得！

至少，

自家个康健快樂愛自家把握啊！

吾最親愛个好朋友，

請你愛拿出最大个勇氣，

同病痛大戰一場!

無到最後關頭，

絕對莫講愛放棄!

祝福!