2015/12/27(日)惠月主席擔綱，討論年度得獎作品。
包括惠月新詩和捷明報導類皆獲獎。
2016/01/28(四康宏主席針對
【黃金客語讀書會】20週年，各人提出心得感受:
兩位寶島客語廣播電台名主持人 劉楨&惠月也是咱讀書會台柱。
20年前首次讀書會【客家青年讀書會】在台北電台
我還沒加入。
會後合照於寶島客家廣播電台
我在101年5月左右受邀參加這個讀書會，那時在板橋府中路兆華的黃金咖啡簡餐店，擔綱當主席首次是討論宋澤萊的小說，于芳回憶說道，當時我很緊張，講客家話都會發抖。這是一定的，一來客語不曾當眾使用；二來在諸位客語文壇前輩前自慚形穢。如今，可以臉不紅氣不喘華客語夾雜發言了，很感恩諸位文友的接納、切磋與指正。
黃金讀書會20週年 笑一阿芳
𠊎加入黃金客語讀書會四年零到五年了。第一擺做主席係101年樣仔。毋記得咧，也毋使打爛腦屎漿來盡命牯愐哟。總講，盡感謝捷明哥个邀請。
𠊎還清清楚楚記得頭一擺去板橋兆華个黃金店，捷運府中站下咧車，經過媽祖廟，彎彎斡斡尋路就尋毋着，歸路仔問人正蹶上二棧黃金店。該暗晡還有左春香老師同行，包尾佢無繼續，上隻月佢嗄招𠊎參加佢另起个一隻客語讀書會乜在新北市某地，𠊎當下就拒絕，何麼死苦恁挷跋，一位黃金會就食毋燥，同性質个月會參加恁多係無係舞死自家?
因爭𠊎會死心參加黃金會完全係分捷明哥這位素人客語作家感動着。𠊎一生人淨會做家，也無變成好額人；𠊎一生人淨會教作文，也無做成作家。成毋成客語作家毋係吾个終極目標，現時同一群志同道合情同屋下人个弟兄姊妹共下一隻月相堵頭一擺，輕輕鬆鬆來食零嗒打嘴鼓，係一隻月裡肚最盼望个期待。
還記得舊年輪着𠊎主席个時節，兜讀咧【龍瑛宗集】小說，最近周芬伶有寫一本【龍瑛宗傳】值得來讀，係無參加讀書會[獨學而無友，則孤陋而寡聞]。𠊎退休了後還早有參加一隻[北市婦女閱讀寫作協會]，一年愛交一千箍年會，逐月也有一擺演講好聽，拜四朝晨，這三四年來時間衝突，𠊎漸行漸遠，今年將舊就無愛交費分佢散棚好咧，因為自家無才調跈恁多棚。
其實參加黃金會過程肚，乜識愛退出，該種複雜个感覺一時間難講清楚，大體係有感覺自家客語無溜掠講無正；在座做下係大腳士，除了捷明哥，會長劉楨、廣播作家惠月、客語雜誌前主編康弘、于芳，𠊎歲數最老，出道最慢，故所當緊張，講客語舌嫲就會打結，越緊張越無結煞，越無結煞就越無想愛參加，又有一駁仔這兜大腳士湊等杈去搞[客語文學進階班。魯冰花文學營]，嗄觸着吾老腰仔，𠊎當無歡喜佢兜無同𠊎參詳就去同人攞合，毋過民主時代少數服從多數，𠊎無話好詏共樣從善如流，也跈等阿堂哥、捷明哥癲一棧仔，毋過吾心肝有過一滴黑唧，搞起來就無恁多鬆爽快樂，這怪怨毋得別人，一抹煞係自家自造自受个。
你愛知得 : 歡喜正會慣勢，慣勢就會歡喜做下去，就容易成功，成功就會有趣味，興趣就會撐等你緊做緊愛，做成一生人个功德。華語講[喜歡]，喜歡造成習慣，好个[聽、說、讀、寫]个習慣正經會分你力量繼續創作下去。
歡喜堵着【黃金客語讀書會20週年】，𠊎係最資淺个學員，毋驚見笑擲磚仔引鑽石，盼望各位先進多多指正。
承蒙大家 ! 恁仔細 !
留言列表
