這下台灣到底變成麼个色相?敢有像報紙報導个:
「罕見警訊 10月失業率不降反升」講,『失業率四小龍最高』、『實質薪資到退14年』、『青年失業最為嚴重』。打早看著這新聞,心情重鈂鈂仔,愐著自家一對心肝寶貝,就愛上30歲了,婚事八字還吂有一撇,吾倈仔前一站仔同我講:
「毋使再牯問我哪央時愛結婚這戇問題。到該時節,我自然會第一個通知你。」續等講:
「係我結婚降子了,無才調蓄,堵分你做阿婆个去煩勞,你敢愛?」
「故所,這央時你身體康健、無愁無慮,多多出國遶尞,快樂享受若个退休生活啊!」我分倈仔个話堵到無話好回答。妹仔共樣乜同我「放話」:
「我現下恬恬享受一儕人个快樂个生活,做麼个你容忍毋下吾个恬靜做自家呢?仰般愛喊我定著愛交男朋友?你係看我無順眼,該我將就搬出去戴,好無?」
事實贏過雄辯!我分細人仔堵到無話好講,續分大細教較精兜仔了。
這時代無能力惜別人時節,逐儕就先愛惜自家,自家好過贏過去關心人家,既經表示過吾意見了,愛毋愛接受,係厥个主意,「日頭赤焰焰,隨人顧性命」,就講係自家子女,作爺哀个也無法度hold著佢兜个愐法摎生活。
恁仔細
承蒙你
全站熱搜