記一場「文學客家下晝茶」 游瑞珠 謝玉賢
日期：20 12年8月18日
時間：下晝兩點—四點
地點：臺北市客家圖書影音中心
參與人員：
理事長黃子堯、秘書長左春香；
主持人莊華堂；
引言人陳淑芳與林賢亮，作者黃義等。
理事長 黃子堯：
今晡日係八月十八日，歡迎大家參加這場「文學客家下晝茶」。
茶有盡多品種，產地無共位味緒就無共樣；文學體裁乜有盡多種，今晡日愛討論个係黃義寫个《東方美人》，請大家一片啉茶一片討論，大家來譫哆，提供意見分作者參考。
主持人 莊華堂：
在周六个下晝頭，來討論《東方美人》這本小說，係用茶葉做主軸線，生出變化性情節，故事發生个時間縱貫七十年，架構係中國式章回小說，內容像鄉土小說，劇情又像電視，值得大家來討論。
引言人 陳淑芳：
𠊎在五月份看忒《東方美人》這本書，書名安做東方美人，涵義又深又遠。這本書會恁餳𠊎一口氣看忒，係因為故事个背景，通盤係恁熟絡个老頭擺客家莊下的情事。
「東方美人」乜係北埔、峨眉地區有名个茶米，用摘茶「兩葉一心」个象徵——「一心」化作書中男主角姜阿鑫，兩葉化作書中重要个兩位婦人家蓮妹同香妹，有一息仔像張愛玲个紅玫瑰同白玫瑰个味緒。
毋過，𠊎有一個愐毋解个位所，請教作者摎在座大家。在該央時，留學日本个姜阿鑫想當然个係大將之才，係當有自家愐法个後生人，仰會恁聽嘴、恁順爺哀，捨忒相戀恁多年个女朋友來，討一個無感情基礎又較年長个香妹？講起來這係一種軟弱个個性，仰會做得㧡恁大个家業？試著毋符合社會个觀感。另外，做麼个蓮妹一直毋肯承認惜芬个母女關係？在書中乜還吂交代清楚。
引言人 林賢亮：
《東方美人》這本小說優點當多，𠊎莫多講；𠊎愛講个係個人認為做得改進个位所。第一係正史上姜阿新宅起屋个年代，𠊎查資料係1946年，書中个姜阿鑫个屋仔係在1951起个，時間相差六年，年代摎事實無符合。
第二係書中阿鑫與蓮妹相戀恁多年，做麼个在恁長个時間後才發生肉體關係，摎這下社會現實盡大無相同。照理講，茶園肚認識，茶園肚戀愛，做得做盡多愛做个事情正著(在場來賓會心微笑)。
第三係人物刻劃忒少，香妹摎蓮妹生得仰般，也無描寫。男女主角係仰仔認識个，係拜喏抑係……形容得暢少。男女主角認識咧30年後正發生一夜情，時間上無符合情理。在茶園採茶个情景，亦無描寫。
第四係對書中人物个角色扮演乜有疑問，香妹請蓮妹嫁給阿鑫做細婆，蓮妹就係二夫人，仰仔恁尊貴地位个二夫人，在公司還愛負責打掃、泡茶這兜像使用人个職務？最尾，這兜故事發生在客家莊，書裡肚嗄完全無用半句客家語，係當毋合理个。
毋過，話講「相佛容易刻佛難，看花容易繡花難」，以上單純係𠊎「雞春裡肚擇骨頭」个看法。
作者 黃義：
先講寫這本書个起頭。在該當時，鄧維順導演需要20集電視劇腳本，劇情愛同客家相關。𠊎个初衷就係投稿電視劇，用章回小說个方式書寫，掌握章節亮點；用「兩葉一心」个靈感，來衍繹親情摎愛情个故事。該時堵好看著《北埔光景》，書中一張張照片像講著該一幕幕个歷史故事，分𠊎開始愐想書寫个內容。
𠊎起先用3000字寫好電視劇大綱，雖然結果無著選，過後𠊎又改寫變做咧12萬字个小說《東方美人》。書中附錄吾爸 黃友本寫个山歌歌譜、歌詞，乜趕等在2010年臺北義民祭典前印出。封面設計構想，係用紅、白兩朵茶花代表書中个兩位女主角，紅色鮮艷表主外，白色純厚表主內；觸摸封面、封底个紙質有沙粒感，就像用手指搓揉茶葉个感覺。
「義民爺」摎「東方美人」茶係臺灣客家个兩大貢獻，影響个人口差毋多像「媽祖」與「米」樣仔，係最具臺灣客家特色个代表。
茶、文化、客家女性个相關：茶樹含蓄沉穩，茶花淡雅素靚，就像客家族群恬靜、淡定、樸實个特質。茶花花期長，耐寒冬，枯萎後才落地為泥；茶葉長青，茶枝質密，乜盡像客家精神。
蓮妹果敢求全，救了姜阿鑫性命兩擺；香妹忍隱包容，相信同支持做老公个一切。兩人成就了茶王姜阿鑫个一生。臨尾香妹提議阿鑫納蓮妹做二房，「馨香兩門」與「蓮心苦成」這兩道命籤，總算在姜阿鑫同蓮妹結識後三十年應驗了，蓮妹正式在姜家有咧名分，過後就同姜阿鑫做伴到老。
主持人 莊華堂：
承蒙黃義先生个說明同兩位引言人个紹介。
𠊎試著農業局應頒獎狀分阿義，因為這本書當有推廣茶葉个作用，相信這擺文學茶會過後，毋單止客家朋友多一項盡好个寫作主題，可能還當多人有趣味去認識「東方美人茶」。
續下來係自由發言時間，各位毋使考慮意見會分人接受也毋接受，大膽提出自己个看法、建議。各位下擺係愛有創作，少寫同歷史相關个，因為𠊎個人認為歷史記載，除了人名以外，其他都有可能係假个，哈哈。
貴賓 黃正敏：
𠊎擔任過茶業工會理事，𠊎來講一下臺灣茶个產銷。日本人稱臺灣為福爾摩沙。在1869年第一批出國茶葉外銷紐約，姜家茶產出後先送到臺北整理、分裝，再過洋行外銷到日本。東方美人茶已有一百多年歷史，它个味緒在紅茶同綠茶之間。回想當年，係𠊎建議愛舉辦理東方美人茶个比賽，經過恁仰个比賽，「東方美人茶」正浮出檯面，過後正有好價數。
主持人 莊華堂：
作者若寫歷史小說，基本素養係史實愛真實。《東方美人》書中，蓮妹係重要个角色。下背討論請用今晡日个主題為主。謝謝！
林賢亮：
書底肚P244蓮妹當頭家娘，仰會去倒垃圾，這實在無麼个可能，𠊎試著頭家娘應該係愛走銀行正著。
陳淑芳：
𠊎認為這可能係同各人个性格有關，也無規定講頭家娘就應該愛仰仔仰仔。
林聰明：
可能係因為選舉期間，大家無閒，故所頭家娘加減做這兜事情。
黃永達：
𠊎个家族中有位叔姆，就係女主角蓮妹个化身。厥倈仔、妹仔事業有成，收入豐湧，她也毋接受細人孝心，堅持毋請外勞，堅持自家歇，自家料理煮飯菜，煮水泡茶這兜事，麼个就自家來。𠊎想這怕係叔姆個人个價值觀和個性使然。
主持人 莊華堂：
就我所知，這種使用人頭路，係宜蘭人做頭家娘个話就毋會去做；毋過客家婦人家定著會。我較疑狐个係劇中个蓮妹讀新竹女子高中畢業，係高等學歷儕，在該當時係「鳳毛麟角」，盡少數，嗄過恁謙卑个生活、恁認命做任何事頭，無當合常理。
作者 黃義：
蓮妹雖然接受過高等教育，因為戰爭等等事故，家庭一下變化當大，生活盡困難，阿爸過身，阿哥失蹤等等，故所她同厥姆做伴，恬恬仔勉強過生活。
彭瑞珠：
𠊎十分欣慰《東方美人》大作上市，𢯭手打響客家茶个知名度。再加上這下兩岸觀光交流，臺灣茶已經賣到無貨，價數盡高盡好，這對客家莊个經濟發展盡有打幫。𠊎所知目前東方美人茶，一斤已經賣到二萬元。
張捷明：
𠊎提供另一方向个思考，茶米係毋係對茶樹項摘下茶青來做成个？這在「客家擂茶」肚異有好揮發。頭擺曹氏兄弟爭權，華語有「煮豆燃豆箕」个講法，客家話語講人好鬥，有講「牛欄肚鬥牛嬤」，係毋係共樣？
𠊎認為後續客家文學在書寫方面，可以從客家語與華語之間語義啦辭彙个聯想——例如姜阿鑫、一心兩葉等，𠊎試著作者阿義這種構想這種鋪陳，分𠊎兜盡好个參考。
主持人 莊華堂：
𠊎也測著大家做得去思考客家文學用漢字書寫个可行性。
左春香：
歷史小說包含文學、文化、歷史盡多觀點，請大家用文化个角度多元个角度欣賞這本書。𠊎今晡日乜有帶來六堆作家曾寬先生个客家歷史小說《出堆》，做得當作延伸閱讀个書來看，請大家傳著看；另外愛講，這擺討論作品个作者阿義老弟，算來係客家界青年才俊，嗄有客家筆會恁多前輩作家到場來討論來譫哆，看得出係一个前輩牽成後輩个團體，後輩來成就前人个團體。
杜沛貞：
客家文學係用漢字書寫，對後生人來講可能閱讀會有兜仔困難，接受度會降低。
徐錦秀：
《東方美人》一書，特色之一係附錄黃友本个山歌歌譜摎歌詞；毋過還做得往專業向度提升。另外FINE係結束之意，用法毋符合一般音樂寫法。
作者 黃義總結：
𠊎寫《東方美人》一書，本意係將原旦寫个電視劇本改寫做小說，係用華語書寫个。𠊎雖然將採茶「兩葉一心」个靈感寫成「東方美人茶」个故事，對於茶葉，𠊎單淨有兜仔瞭解，並無實際耕種過，故所定著會有「爪毋著癢」个位所，想用吾手寫吾心，乜定著會有無足个位所。𠊎用華語个「憐香惜玉」作引仔，《東方美人》這書裡肚个重要女主角，有詹蓮妹、黃香妹、詹惜芬、吳玉玲，𠊎預留伏筆，續下來做茶產業、茶文化个延伸，書寫續集，該央時邀請大家還係來痛惜，來提供意見。
承蒙大家！
http://tw.myblog.yahoo.com/lily4469/article?mid=19184&prev=19364&next=18609&l=f&fid=40
(本文純作記錄，恕不開放回應。全文見【文學客家】第10期)
留言列表
