阿芳心曲

樹上雕仔噭嗹嗹，  愛討餔娘又無錢；

(樹上鳥兒吱吱叫，要討老婆又沒錢；)

兜張凳仔同爺講，  講來講去又一年。

(端張椅子跟爹禀，說來說去又一年。)

感謝二年生學生仔阿熙个阿婆連續送我兩本客家【古人言】&【歌謠】。

這阿子熙二年生正選[客家語]學習，頭腦巧英語底仔深，學起客家語拼音、用字，輕鬆簡單進步多。

我本成講好過年時節，轉頭份愛去拜訪子熙个阿公、阿婆；毋過，嘴講个一直吂實行。昨晡日上課時節，子熙同我分享

厥四歲个老弟个[糗事]:

從細分阿婆(南庄國中數學老師退休)渡个老弟講一口流利客家，【客家古人言】个歌謠一抹煞熟絡，做得從頭到尾背透透。

有一日，睡當晝，老弟痾羊仔屎，細細、硬硬、圓圓、烏烏个屎矻kid，分佢扯忒紙尿褲絮xi在滿哪仔，阿婆無掃淨，到暗晡睡目時，阿公在眠床頂拈到一粒烏色个硬屎粒，當係巧克力，差一息仔塞入老弟个嘴空肚。

子熙興嘟嘟仔同我講這段news，就我一儕笑哈哈，在座三位同學聽毋識。

當晝共下食一餐正40箍个營養午餐，烏龍麵、主菜係細雞翼，雖然肚屎枵過橫，乜無願食––老咧就恁執性，無飯不飽。一旁衛生組長莊老師講:[可能會無罅(moˇ la不夠)，學生仔好食(hau siidˋ愛吃)。]

孟芳老師啉等教學組長李老師請个奶茶，引講:[還幸福，今晡日係我六十歲个生日。]舊曆二月廿一，佢同吾老公同年，肖蛇哥，小龍女!恭

祝你高壽食百二， 子孫賢良在堂前；

壽比南山千古見， 福如東海萬萬年。