close
昨晡日係本學期第一日上課个日仔
因為宕睡到7:30正床
匆匆忙忙騎自行車到學校已經8:10邊仔
我當少恁慢正到
煞煞搬教材、課本上樓
煞煞寫白板
(孟芳老師行過來講[情人節快樂]還送我精美手工吊飾
我......)
好得第一節六年生个認真、乖巧
第一課<天穿日>課文吂教 就會自家拼音試唸
還唸到真好!
有一位較慶个紫晴帶動學習
實在好福氣!
四、五年生異多儕分導師指定校內客語演講、朗讀
我叮嚀遽遽同演講稿仔寫好mail分我
我正有時間來潤稿並指導
係講放寒假前先通告指定便
放尞時節有心个學生較有時間好準備
愛摎教務處組長反應一下
四年生个盡得人惜
講頭知尾、舉一反三
第一課<月光光 秀才娘>
連<月光光 秀才郎>還有頭擺學過所有相關个歌謠
一抹煞背出來
分我盡多个歡喜
二、三年生乜較知人我咧
毋過
包尾一年生个
五個細人仔五隻性
順咧這隻又顧毋咧該隻
其中一個細阿妹引講明年佢無愛選[客語]
害我無結無煞
下星期愛仰般來照顧著厥个[奇蒙子]呢?
全站熱搜
留言列表