阿芳心曲

2010/11/20（六）農曆十月半

昨暗晡同吾老公去桃園機場接厥滿叔兩公婆轉通霄。

11:30已經半夜咧，正轉到屋下。

吾家官還吂睡目，看到佢踔啊踔行碎步，心肝肚異毋盼得──

印象中，佢總係大口食飯，

有筍干、爌肉這兜「caˋ 飯」(下飯)个菜好傍就做得。

從來罕得食青菜、水果。

「我無糖尿病，也無高血壓，嗄愛洗腰仔！」

7年來一星期洗三擺，輒常聽佢恁仔講。

佢會有洗腰仔个命運全係佢自家造成个──

食菜死鹹，愛攪豆油；愛食成藥。

毋過，到這下我想佢也還毋承認係自家造成个原因。

這下，厥个活動力越來越衰弱，話就較無愛講咧！

連洗身就愛厥倈仔吾老公ten手(幫助)，

人到老係無健康，食著全愛靠人，

實在無尊嚴！

今晡朝晨吾兩公婆陪吾家娘去台中市立殯儀館

參加四姨丈个告別式。

龍巌人本機構所主辦莊嚴隆重个佛教儀式，

分死者家屬同親戚朋友心肝肚就感覺到當燒暖。

年初正大病過个吾家娘還恁周到牽神到場致意，

看佢背駝駝仔拄等遮仔做拐仔慢慢仔徙步行，

我乜異感動。

轉到屋下，佢還摘屋唇个抹草同燒符紙泡燒水，

拿面帕汶符水，摎我捽面。