係驚鑊仔燒，就毋好入灶下(若怕鍋熱，就甭進廚房)。講愛來教客語課，乜係自家(自己)興嘟嘟仔(興致勃勃)，經過千辛萬苦正謀著个工作，仰般(怎麼)一下半成時(一下子有時)堵著(遇到)無爽快、不如意个時節，就想愛打卵退(打退堂鼓)?既有今晡日，又何必當初踏入來這行，還背等[同人搶飯碗]个臭名?
今晡臨晝仔(今天午前)三年生个小朋友，其中一班三個細人仔，因為上一堂課教室導師留佢兜(他們)看表演，有較慢一息仔(一些些)入來吾客語教室，另外先來个別班學生仔自告奮勇愛去尋佢兜。結果，我耳背背聽無厥(他的)个話語，較大聲問佢，這位細倈仔(小男孩)嗄(卻)流目汁(哭、流淚)，親像受著當(很)大个委屈，害我遽遽(很快)安慰佢，還同佢會失禮(跟他道歉)。
臨尾(後來)，下課10分鐘前，三儕分一組[會話練習]，有一個人緣無已好个細阿哥無人愛同佢共組，高不將(不得已)我同佢共下練習，慢慢仔教佢，又還愛看顧別組練習个情狀，我一儕當三儕用(一人當三人使用)急到奈毋何，等[學習單]做好个時節，一個一個排隊拿來分我檢查，我順續問佢兜儕該下个[會話練習]，吂知該隻無人緣个阿安仔一教再過教幾下遍，佢還係鴨仔聽雷公，有聽無曉得。該下火盡猛(那時火大)，黏時(當下立即)大聲咄(喝斥)佢:[回家好好練習，下一堂課再唸給我聽。]我毋敢用客語交代，因爭佢聽毋識。接下來，顛倒分我著大驚(反而讓我嚇一大跳)，這隻細倈仔放聲大噭(哭)，還噭無目汁(眼淚)个。阿姆哀啊!(媽媽咪呀)膽膽大，做婆太!
我定著(一定)毋好(不要)分佢嚇著(給他嚇到)，我係先生，有先生个高度、有先生个智慧、有先生个責任，先敨一下大氣(喘口氣深呼吸)，心肝肚喊自家[緩緩仔來，定定仔來，係無麼个難事个]，收好單槍播影機，再過兩儕(兩人)大人對細子，先生好性體一句一句同佢講清楚，包尾(最後)問佢(他):[我陪你轉教室，愛無?]佢拂頭(搖頭)表示毋使(不必)。
小可事齣定定(小事一樁而已)。這滿(如今)，多謝你有耐心聽我綹麵線(訴說)，吾心情既經就像外背(外頭)个日頭(太陽)恁烈、恁箭人(陽光令人不可逼視)，無麼个烏陰咧。承蒙你!恁仔細!
學校運動坪脣口个豔紫荊，恬恬仔笑我係大戇嫲。
留言列表
