阿芳心曲

        昨晡日2014-11-22拜六係舊曆十月初一，節氣[小雪]。這幾下日來天時已好，歸日日頭恁烈。

        今晡朝晨妹仔洗咧自家間房个被單床巾這兜，還陪我去市場dinˊ一輪(轉一趟)，當晝還煮菜分我食。分人奉待个感覺盡[要io著doˋ](很棒)!毋過，分佢虧咧兩句:

[別人个阿姆洗衫洗被單曬被骨當煞猛，歸樓頂無位仔好曬；吾姆(我媽)恁懶尸......]我續等講:

[若姆(你娘)總想愛自家去哪尞，係無?]

[著!你有閒總緬自家个活動，無已多時在屋下啊。毋過，最近放假，有較在屋下哩哟。]昨晡日佢先起勢拚掃，兩子哀共下整理食飯廳一細側角个櫥仔，清出二十零年無用著也毋識停動過个有个無个帽仔，韻律衫，泅水泳帽、衫、目鏡，巾仔，襪仔......害我已敗勢，又當驕傲，吾妹仔還慶哟!

       臨暗仔去河濱公園，忍毋核(忍不住)就同無妹仔个秀美喋(誇)[有妹仔真好!]阿秀美騎等180CC个重型機車威風凜凜講愛請食牛肉麵，結果阿賴、樂樂同我有絡食一餐。秀美摘仔兩包【一葉草】，我拿一包轉屋下，朝晨洗淨來生食。一到(一次)正做得(才可)食6.7皮(片)定定(而已)。

  洗淨來夾胖(麵包)食，盡利便。聽講，顧肝。

          我現下室外活動盡量減少。比論講:登山隊幾下年無參加咧，今晡日佢兜行程係[擎天崗、頂山、內雙溪]，當像舊年正跈佢兜去過，故所也無趣味；連頭過親像行灶下个南港山系四獸山就罕得去。可比在該搞(好比在那玩)[自閉]，無相干!順等自家个心情來過日仔，恬恬(靜靜)在屋下看書、看電視，恁樣我就盡滿足咧哟!