阿芳心曲

最近，連續大開眼界看了兩場鄭榮興客家採茶大戲──

中山堂免費欣賞《喜沖喜》；新舞台買最貴个票看《雙花緣》。

其實，兩齣戲个演員結構就係雙生雙旦雙丑(兩媒婆)三家庭一梅香（女侍），劇情發展也大同小異。因爭，第一擺个映像總係盡好，故所看了《喜沖喜》，馬上訂票《雙花緣》，還對這齣「精緻客家大戲」期待還个高。結果，感覺普普仔，真經思量毋得，ngaiˇ，人心節節高啊！

這兩齣戲係國立台灣戲曲學院師生共襄盛舉个年度演出，我係外行人，乜看到當入文，演員个

平平係雙生雙旦，《喜沖喜》當中，一登對、一對當；《雙花緣》中，兩對就恁稱頭。雙丑(兩媒婆)个串場出現，前者較暢順合情理；後齣就全靠 黃鳳珍 先生扮个「阮媽」獨挑大樑，等後尾二大娘旋風出現，分人莫名其妙。當然，後齣在三隻相當文優高等个三大戶人家，做爺哀仔仰般「自古天下父母心，孝子孝女費精神」个「著墨」異多；還有傳統家庭公婆對待个方式乜異生趣。

《喜沖喜》底背个口白，無論老古人言（俗諺）、師傅話（歇後語），隨口溜溜出就像「大珠細珠落玉盤」美不勝收，看到心開笑滿堂！

*「一年三百六十天，日日做到無時閒」。

*「大人大種還無知輕重」。

*「一年過一年，扯起舊聯換春聯」。

*「耳空裝毋落，外加 一米 籮」(不聽人勸)。

*「赤米煮粥滿鑊紅」。

*「只愛立志求上進，日晒棉被慢慢鬆」。

*「人無風雨在人間，花無百日在花園」。

*「偷雞不成失頭羊」。

*「丈人哀看婿郎，越看越靚裝」。

*「燒著倒頭香，正有恁樣个阿爸阿姆」。

*「頭大面四方，肚大積財旺，腳骨大踏穩地」。

*「為到嬌妻五內焚，害我望到兩眼紅」。

*「八字命注定，真金不怕火」。

※ 胡椒子跌著飯甑肚──麻飯(麻煩)。

※ 棚頂過目──高明(高眠)。

※ 新買个蕃薯刷──好刷好刷(好說好說)。

※ 新買个掃仔──好掃好掃(好說好說)。

※ 遮仔(傘)無頂──畫柄。

※ 劉備招親──弄假成真。

※ 火燒甘蔗園──無合。

《雙花緣》：

*「賽過嫦娥氣死美貂蟬」。

*「船行順風愛緊撐」。

*「東西村南北莊，左右門前後家，人生就像起高樓」。

*「識文曉書詩，有子好護持」。

*「ngaiˇ就係斧頭，專劈你這樹根」。

*「慢閃秋波仔細瞧，看見自家生來俏，好似鮮花一般嬌，青絲髮烏光□□……      好比九天玄女下雲霄」。

*「花開四季開無停，就係天上地造成」。

*「膽恁大，做阿太」。

*「買賣不成仁義在」。

*「贈君玫瑰君莫笑，一日三朝愛看好」。

*「驚鴻一瞥影無蹤，光芒四照滿園春……錯過佳人難再尋」。

*「芙蓉面眉表山秀，這款女子世少有」。

※ 狗皮入相框──不像畫(話)。

※ 麵粉攪雞卵──混蛋。

※ 胡搞蠻纏，遮仔無頂，摎你盡拼咧!

※ 三隻鼻孔來多管。