阿芳心曲

成德小天使

頭一次上國小个客語課程，昨暗晡正「鬼zungˊ亡」緊揰揰仔請教有經驗个先生，到底第一堂課愛仰般來「建立班規，維持秩序」?

「最好，買一支耳麥，保護若嗓音。」鄉親朋友良心建議。

「ngaiˇ教書一生人就無用麥克風，敢有需要？」一支愛4千零个銀，當然ngaiˇ毋盼得也無打算買。

一年排一班，朝晨四節，下晝兩節。除了五、六年生班級人數多，乜較調皮以外，其他年个，親像小天使共樣，逐個細學生仔盡得人惜恁得人惜。盡感謝學校排課該安排。

ngaiˇ一片進行課程，一片思考愛用麼个方法正做得引起佢兜个興趣，係講打滅小朋友學習个趣味，該ngaiˇ就對毋起自家同恁多教ngaiˇ个先生咧！

當晝前第四節，二年生正三個乖巧又當得人惜个小天使。堵好第一課＜水果>，唯一个靚靚細阿妹仔看著書肚畫个果子，佢講：「肚子好餓，口水就流出來了！」(佢毋曉得講客家話！) ngaiˇ拿出海苔米congˇ，一儕一隻，厥隔壁个細俫仔無愛，分佢，佢乜毋敢在課中食，好得馬上就下課咧！佢嗄拿還一隻還ngaiˇ，「我吃一個就好了，兩個我吃不完。」

最包尾上課个係一年生个四個小朋友，前一節三年生13儕正一下課，佢兜就頭勾勾仔望啊望，ngaiˇ請佢兜入來。

四個「新鮮人」無一個係客家人，做盡毋會講客家語。

就正教四隻相借問个語詞「恁早」、「你好」、「承蒙你」、「恁仔細」，做盡笑到毋會煞台，小玉同文雄笑到腸子會打結樣仔，一直講：「老師，你是講笑話的，還是教客家話的。」一時間，吾心肝肚百味雜陳……「有恁好笑噶？」

毋過，這低年生个小朋友，天真無邪个樣仔就同該雪白幼嫩个皮膚共樣恁得人惜。

𥺆𥺆𥺆