阿芳心曲

2010/9/3(五)

這一駁仔，越來越懶尸，睡到日頭晒屎胐正hong 床。

今晡朝晨目珠擘仔開來，已經8:00邊仔，

同妹仔通過手機，佢講今晡暗晡就會轉來。

煞煞洗湯了，燙一息仔蕃薯葉，一札大麵，攪爌肉味。

食飽朝，歡歡喜喜出門去。

行基隆河左岸4號水門→松山火車頭→中坡北路→永吉路→忠孝醫院→東新街→成德國小

看了下星期愛開始上課个教室，教具搬入去，拿著一~六年生个「暫時」學生名單，滿心歡喜。

轉屋時，ngaiˇ行成美橋→南港路三段→基隆河左岸，較遽。

麥帥一橋下，堵著10空儕阿姊跳土風舞，

ngaiˇ自動加入，＜高山青＞、<那魯灣之歌＞、＜四季紅＞。

熟悉个旋律，簡單个舞步，喊醒吾歸身快樂个細胞。

龔師姐、 陳 先生、 林 先生相賽邀請ngaiˇ加入，

每禮拜一同五，朝晨9:00~10:30。

蓋清个天空頂分明雪白个雲彩對ngaiˇ微微笑，笑微微。

日頭雖然恁烈，清風陣陣ngaiˇ對面吹，

天涼，秋來咧！

ngaiˇ感覺：

自己盡幸福！

乜祝福所有相惜个親朋好友

週末快樂  天天快樂