阿芳心曲

9/4

妹仔个生日。

佢昨暗晡對花蓮轉來，

厥哥特別準備「阿默」cheese 雞卵糕同佢慶祝。

兩子哀透暗晡譫哆(damˇ deˇ，閒談)毋煞。

𠊎ngaiˇ一直愐天光日朗讀比賽个事頭，

也一直煩勞後日，大安高工，教師協會果發表，

除了愛上台表演，還承領煠紅卵、定壽桃這兜齣事。

睡到轉點時，嗄醒起來，

歸暗晡迷迷癡癡。

朝晨泅水了後，去市場買辦東西。

晝就無食，同妹仔共下坐計程車去建國南路二段「北市圖書總館」。

報到時，正發現身分證明全全無帶著，

妹仔煞煞計程車來回，乜赴毋著2:20正式比賽開始。

ngaiˇ從頭到尾聽鄉親朋友个朗讀，

雖然文章內容異熟絡，

毋過，盡多語詞有「爭議」，

也學著真多。

最包尾，涂春 景 先生个講評，

受益良多，盡感恩。

「係講大自家毋講客家話，客家話強強就會滅忒」佢語重心長講。

有幾多客家鄉親像可敬个涂先生恁樣煞猛對客語傳承盡心盡力？

「親家」展淇兄、戴宏盛、魏新仲、鍾淑貞、黃秋枝、黃鳳榮，

這兜仔新舊熟識个先生朋友得著前十名。

恭喜！

取得台北市代表權个，係一個細妹仔── 葉秋菊 先生个妹仔陳映竹，

佢從小學一年生開始，對客語各項競賽就恁湛斗，

葉老師栽培指導當成功。

恭喜！

雖然ngaiˇ「呷緊弄破碗」，

但係，一切都係盡好个安排。