阿芳心曲

阿姊老師：您好

這駁仔朝晨頭較走毋得，放尞日也無從容好過，昨晡日釘釘去該位觀摩學習，盡好个係現場做得看著恁多有志一同又有好久沒聯絡个朋友，順續好來講講談談「閒話家常」! 背尾，有想順路去看一位戴在圖書館附近个朋友屋下行行阿，故所歸場還吂有煞棚，敗勢涯就先告退出來。

日日上下班分隔大部份个時間，微尾末節僅可加減看兜客家「老古人言」个智慧，來增長人生个常識摎應對進退个心性，其中正經愛感謝好在有像涂先生寫个《聽算．無窮漢》，越看越入文，也得到盡多个道理所在，句句就像「阿太个話」恁親切，在生活當中帶等涯來行。

阿太講「人个命斧頭削也削毋掄」、「自家个斧頭削毋著自家个柄」，愛仰般來看待人生 ? 正經參毋透也解毋開，單淨步步个緊行緊看等來 ! 承蒙 阿姊老師常透來行聊恁會相惜，還篇篇都留言鼓勵涯，做得恁樣共下來分享，尋轉生活中个感動，恁樣較好過日也會較值得兜仔。

祝  如意

翠真   2010/9/5

**************************************************************

 親愛的翠真老師:

承蒙你昨晡日在比賽報到台前，分ngaiˇ異燒暖个支持。

若爺哀个身體還健無?你係講，逐朝晨，抑放尞日，你還愛照顧兩老仔?像你恁樣有孝个妹仔，通台灣難尋!

毋係ngaiˇ同你燒壞話，爺哀乜係兄弟共下[享有]咧!做毋得揱忒老弟有孝世大人个權利，爺哀个事頭毋使一抹煞自家包揫揫啊!

盡愛看你部落格，一篇又一篇短小簡明、分人思考个人生道理，滿哪仔就係。感恩个心，感謝有您!

涂春景老師个<<聽算，無窮漢>>係吾个第一本客家語【聖經】。5年前，ngaiˇ靠這本書，參加北市客家語演講比賽[中學教師組]拿著第一名，該年堵堵轉到私校，故所，無心性去參加全省比賽。這站仔，學著一息仔[正殼]个客語，嗄倒糾起來，無該膽量開嘴講，因為【學而後知不足】，正知自家个發音有爭差。所以，昨晡日因無帶著身分証無法度參加比賽个齣事，也係個好齣事，在該過程中，吾个[收成]盡多恁多。

下星期開始，ngaiˇ愛再牯教書，這擺教個小學生，盡著同頭擺个國中生無共樣，ngaiˇ用斬然改變个心態，從新出發。無定又乜係【教然後知不足】，恁樣知得把握【教學相長】个機會，盡好恁好。

總講:ngaiˇ係個恁幸福盡幸福个婦人家!祝福

食著無窮

                                                           弟子

                                                                      阿芳敬上2010/9/5

P.S.恭喜你碩士學位，既經完成咧哩!