2010/9/1
昨晡日係心情起落盡多个一日。
(一).
吾心肝妹仔愛去花蓮出莊(出差)幾隻月,一直到年下。
雖然厥公司講,每禮拜休息兩日,有火車票分佢轉屋尞,
戇哀仔个ngaiˇ透暗晡無睡好,較愐就係「毋盼得妹仔離開身邊」,
心肝頭一塊肉割下來个艱耐啊!
係恁樣就捨毋得,等到佢堵著生命中个「真命天子」時,
該ngaiˇ愛仰結煞正好?──面皮皮仔,老哀仔跈嫁過去!?
一下,就會觸著對門親咧!
毋係「自家妹仔自己說(sodˋ,稱讚)」,
佢確實盡得人惜ㄝ恁得人惜,十人看著十一儕愛。
這站仔,佢下班、放尞時節,
旦事(總是)同ngaiˇ ten 手拼掃屋下,洗衫、煮飯做盡貌。
佢還會做西點餅乾、雞卵糕。
旋風講愛戴外背,ngaiˇ第一毋慣就係,少一個打嘴鼓、講心事个伴。
係講,佢頭擺大三暑假乜識去日本京都大學交換學生兩隻月,
又毋係毋識離開爺哀咧哩!
好愁毋愁,愁該妹仔吂有好兒郎,好來配鳳凰!
(二).
下晝聽偶像 路寒袖 三點鐘个演講。
喚醒ngaiˇ做台灣人个民主意識。
(有閒,正來專題分享)
(三).
臨暗仔轉屋,
吾老公講佢透日肚笥又毋好,毋敢食東西,驚怕屙痢肚。
等ngaiˇ定定仔煮好暗餐,
佢兩子爺食淨淨。
毋過,佢歸暗晡無睡目,
輒輒hong 起來尋便所。
好愁毋愁,就愁佢胃腸毋好,愛仰結煞正好?
(四).
接著市立圖館通知,9/4「客語朗讀」比賽手冊,
阿姆哀!根本ngaiˇ毋記得這齣事,
12篇從何準備起?
先電話請教季珊,
害厥耳公受不了哇!
2010/9/2
今晡日吂4點,就蹶起來,翻字典。
本成答應 默子愛去植物園聽
立犀&立犀內子聯手講演,
但係,回籠覺睡到8:00
煞煞連絡 默子,
"不見不散"[言猶在耳]
ngaiˇ旦旦[見老公忘朋友]
又一擺「食言而肥」──注定今生瘦不了!
再又打電話勞攪埋頭寫博士論文个楊寶蓮先生
吾老公在脣口講,毋相干,
"保持平常心 對己有信心。"
就係 ㄇㄟ~
昨暗晡,還喊ngaiˇ,無愛參加啦,[沒意義的]佢話(va,勸告)ngaiˇ。
"堅持不放棄 人生有意義"。ngaiˇ同自家加油。
11點邊仔,連稀客 圓圓也打手機講,仰會毋來?
ngaiˇ信用破產哩!──
這正係正經愛愁个重點。
留言列表