有一隻學老朋友，佢係法學博士，既經公家機關退了休，還有上班又做志工，當無閒；厥一對子女在日本、美國工作，30大零吔還無結婚，故所佢兩公婆各做各个事，乜快樂康健過日仔。
佢有閒就看客家電視台 徐薇 老師輒常<看電視學客語>个錄影網站，煞力牯學客家話。[佢係正實个學老話資源先生，兩公婆乜識湊等共下去小學，佢教學老話，厥餔娘（ 高中 先生退休）手教唱歌仔同維持教室秩序。]
過兩日過兩日佢愛帶厥退休个同事去吾故鄉附近个南庄「一日遊」，佢問知抑毋知「乃木橋」个處所同由來，阿姆哀！對故鄉來，毋知故鄉事。當見笑！佢嗄摎講，講仔兩遍，乜無聽入心，就知係同乃木將軍有關个故事。
佢上YouTure網站尋著客語歌<初一十五調>編歌詞：大家歡喜來遶尞，南庄个風景正實靚。向天湖脣練身體，神牛祝你食百二。(註：向天湖畔「賽夏文化館」，神牛館都是旅遊景點。) 又還一條歌詞：人生毋使忒過愁，有閒時節就愛唱山歌。貧窮富貴命註定，身體康健快樂多。還講，食南庄个薑絲炒豬腸，無肥乜會靚。
「老人成細子，用心來照顧。逐日愛運動，食到一百九。」（聽講，法國盧爾德山區一隻信天主教莊頭个人各各當長命，有一隻婦人家220歲，面皮還幼嫩白淨哩！）「別人个龍床，無當自家个狗竇」咧！
還話(勸告) ：
三好──處處因緣好
日日身體好
時時心情好
三多──褲袋錢銀多
工作貴人多
面上笑容多
恁樣就「康健快樂多，人生自然好」。
有閒時節多看書，無好「狗打老鼠──多管閒事」。係無，「老鼠跌到米缸肚──一重歡喜，一重愁」，「好愁毋愁，愁該六月天公無日頭」，用笑容美化生活，「笑一笑，十年少；愁一愁，白了頭」。
交朋友，目愛金，無好結交「砧枋狗──酒肉朋友」，「朋友毋講錢，講錢多牽連」，有兜人「嘴甜舌滑心頭辣」，分佢騙到捩捩轉，還當佢係貴人，結果「風吹雞卵殼，財去人安樂」啊！有兜人表面工夫異會，「睛瞑仔看告示──做樣仔」定定，講个事做盡「睛瞑仔看電視──有聲無影」；有兜人「食飯打赤膊，做事尋衫著」，無就「食飯擎碗公，做事懶震動」。恁樣就「用竹簍戽水──毋採工」咧哩！
佢還用國語同勉勵，來者不拒，去者不留。順其自然，絕不勉強。有德則助，有緣則渡。佢確實係吾「良師益友」！
P.S.【乃木橋】由來:
日據時代，1895年南庄國小成立時，當時台灣總督是乃木將軍，他目睹賽夏族原住民下山販售山產，上下爬坡吃力，於是動用薪俸(特支費?)建造一道階梯，此爬坡道稱為【乃木橋】。特色係階梯深寬，方便住民放置籮筐、畚箕之類的置物器。
此百年古蹟位於南庄老街郵局邊，靠近[桂花巷]。
留言列表
