阿芳心曲

外國歐吉桑摘梨仔

「喔喔！」雞公啼咧！歐吉桑當無閒，愛遽遽將熟水个梨仔摘下來，係無，特過熟吔沷沷跌就忒打爽咧哩！「故所，愛煞猛摘梨仔正著」，歸日仔佢心肚總係恁樣想等。

佢摎阿魯米梯棑凴著梨仔樹梗頂項，蹶上樹頂摘梨仔，乜無驚梯棑承受無起厥肥牯牯仔个圓身，煞力牯將梨仔一隻一隻扭下來，裝到肚褡圍身裙个大袋仔底肚，等袋仔淰吔，正下梯棑來放入地面上个三隻大籮旮肚項，續等共樣蹶上樹摘梨仔，歐吉桑頭磬磬仔恁認真煞猛拼事，根本無注意著有一隻掌羊哥仔牽等一條羊仔行過樹下，該羊仔經過樹下籮旮脣續頓一下腳，可能「戇羊想食甜水梨」，眼視視仔乜眼鑽鑽仔注視該籮旮个梨仔，掌羊哥仔當然無從厥願，硬摎佢拉走，該羊仔既經行過去咧，還捩回頭目勾勾仔望啊望。

當然專心一意在該樹頂摘梨仔个歐吉桑全然無看著這異生趣个畫面。

過一下仔，一隻頭林戴等帽仔个細徠仔騎等自行車來到梨樹下，望佢爸一眼，佢爸無插佢。佢用仔全身个力量正摎一隻籮旮放在車上，頭望望仔再牯看厥爸一眼，同厥爸招呼一聲，厥爸堵堵無閒叱咤，也無眡貼佢，佢就將歸籮水梨載等走哩！

細阿哥遽啊遽，行啊行，面前堵著一隻細阿妹仔，乜騎等自行車面對面過來，「喔！這就係朝思夜想咧哩！」佢心肝一想一愐一分心，哀哉！面前一粒大石牯仰會全全無注意著呢？乒碰！車仔撞著大石頭，籮旮倒貶下來，底肚个水梨一抹煞散著歸地泥項。阿姆哀正得！無單淨梨仔倒忒，細阿哥也痛著喊無敢，歸隻面糾做一團，座定敗坐著地泥上緊挲厥痛腳──膝頭溜皮咧！哀！為著貪看一隻靚細妹，害著自家恁樣淒慘个結果，定著無下二擺咧哩！

就在這下，佢跌倒從頭到尾个情形，分路脣三隻拿等乒乓拍仔在該搞尞个細徠條仔看著一清二楚。這三隻有愛心个「同學」，煞煞行前扶佢起來，乜同佢手摎梨仔拈起來了後，佢同該三儕背囊對背囊就各行各个路咧！這有孝个細徠仔牽等自行車行無幾步腳，該三隻其中一儕，歕嗶嗶仔喊載梨仔个細徠仔，佢停下來，原來該儕拈著該下佢跌忒个帽仔，愛拿還佢。佢順手拿三隻水梨，一儕分一隻，算係答謝朋友黏時幫助个恩情呀！

三隻細徠條仔也無細義，一頭喫等梨仔，一頭行過梨仔樹下，呵！堵著厥爸正爬下樹，看著這三隻細徠條仔喫等梨仔經過，續等佢算一算厥籮旮，「仰會旋風少忒一隻，伸著兩隻定定咧？」佢係講心肚盡多不解，毋過，也異有修，無開嘴罵該細人仔唷！乜目金金仔看等三隻細孲仔經過。