close
今晡日共樣摎保生、碧媛坐哲華个車仔，去基隆教師研習中心上課
── 謝杰雄 先生指導个「客語師資培訓」。
啀問自家，退了休，安樂生活無過，恁樣疲爬蹶為麼个？當初因爭目珠無好，電腦也毋會，高不將退休。該這下，做麼个本本乜愛食目珠、搞電腦。你無這兜基本个本等，在這時代可以講寸步難行咧哩！
盡佩服 謝 先生這細徠條仔，一片上班，一片讀博士班，還愛為著客語傳承个大問題傷腦筋。朝晨摎四縣腔上「音標」課个宥琳先生同另外一位共樣後生个細妹先生，乜分我盡多感動摎醒覺。我係客家人，毋過，講个祖宗言吱吱唔唔，讀起客語文發音無正確，也無法度順利仔來寫客家文章。問題出在奈位？
老吔正來學吹嗒，吹咧成調無？就正經愛看自己有堅耐無！食晝時節，同坐著隔壁个細阿姐仔打嘴鼓。阿姆哀！佢正細ngaiˇ一歲，看厥身裝就比ngaiˇ年輕20歲咧哩！厥降4胎人，最大个徠仔既經34歲咧！做盡繳到大學畢業。佢國中後，就靠自家半工半讀完成大學文憑，做過幼稚園先生。今年申請中央大學客家學院研究所，天光日愛口試，祝福佢一切順利！
聽佢講厥盡坎坷、衰過个身世──從小父母離異，跈哀仔再嫁，後爺毋惜，老妹鄙視，早年結婚……恁堅強个苗栗頭份珊珠湖鄉親，真經客家精神个表現！
感恩佢同ngaiˇ分享厥故事。乜同時祝福所有同學學習快樂，福慧增加！
（P.S. ngaiˇ一轉屋就遽遽安裝客語文字輸入，毋過，無成功！當心灰嬾頭起咧哩！）
推薦客語好blog:
全站熱搜
留言列表
