阿芳心曲

吾家娘盡揀食，

厥嘴斗無好，

略略仔臭臊魚仔一滴就毋敢食。

毋過，

佢一生人就擎鑊鏟慣慣，

較仰般自家無愛食的東西，

佢乜會煮分屋下人食。

我一生人就單淨堵著恁樣一位

心肚無自家、總下為家人勞碌轉環(kuanˊ)个婦人家。

這央時，通霄、苑裡海脣出產鯊魚，

當地人將鯊魚肉剁到幼幼，

摎半肥腈(肥仔愛較多兜仔)豬攪肉，

摻兜芹菜、蒜仔、胡椒粉(辣椒仔)……配料

攪勻，續等揉著圓圓，搭著細餅樣仔，

放入平底鑊煎熟，

香噗噗个鯊魚餅就大功告成咧哩！

昨晡日我就摎吾家娘講，

我想食鯊魚餅。

佢交代我，愛同市場一位跛腳哥買，

厥賣个係雙髻仔个(雙髻鯊)較粘饠較好食。

買咧萋魚歸垤，拜託豬肉店頭家摎豬肉共下攪綿綿。

配料摻好又臨時將當多韮菜剁落去，

結果味緒全全無共樣！

啊!

害吾家娘引道嘆：

「貴森森！正無採！」講萋鯊魚當貴。

P.S.4/15補記:

今晡朝晨打早就去市場，

買著一把人家種个幼芹菜摎蒜仔，

任尋賣魚仔个跛腳哥就尋無著。

轉著屋下，

吾家娘講:

[昨晡日愛買蒜仔，你無買!]

[今晡日買有蒜仔， 嗄無鯊魚。]

[做麼个尋無賣魚个? ]  我問佢。

[今晡日起北風咧，漁船無出門哩，

毋可能有擺攤仔賣魚仔啦!]

所得斯加!?  啊離嘎多狗在媽思!(日語)