阿芳心曲

爌肉

我盡好食个客家菜就係炆爌肉。

聽講吾陳家有一个阿太太(高祖父)逐日愛上街行地理（堪輿業）以前，盡著(一定)愛食一杓麻半肥腈个豬肉正出門。佢交代屋下煮飯个婦人家（該央時大家庭輪煮），摎割著2、3斤个三層肉切著薄片，用滾水燙過，鹽泡泡仔，裝在杓麻肚，hudˋ（喫）一肚飽了正上班。

故所，我得到真傳好食三層肉。細人个時節，大家食著就無豐湧，總下愛等到過年過節正有大魚大肉好食；還有，該央時乜無像這下麼个就恁利便，比論講，做好事、壞事時節愛請人食飯，無恁多食店好註文訂桌，百項灶頭鑊尾个事做盡愛自家愁慮打理，總講頭擺客家人請人食飯，一抹煞愛自家料理，該食著个齣事底肚，有名个「四炆四炒」──炆爌肉、炆鹹菜、炆菜頭、炆筍乾；炒肉（客家小炒）、炒豬腸薑絲、炒鹹酸甜（豬肚、豬肺炒木耳、黃梨）、炒蒜仔（芹菜）（配豆干之類）──底背第一好吃个就係「炆爌肉」。

爌肉愛用半肥腈抑係胛心肉去炆，豆油、米酒不可少，摎一息仔冰糖，順續磡幾隻蒜頭菣香，歸大鑊炆著綿綿絡絡，鼻著該香味，口涎水就會加吞幾口，等到爌肉上桌个時節，一筷仔先挟較腈該垤，成時手腳無遽，較慢兜仔就伸个肥窒瀾澗个肥爌肉，淰淰孜孜食著有一滴仔畏胲（反胃），細人時節又驚又愛食，佇該燒燒个白飯項，揶兩湯匙爌肉味攪攪仔，啊！食到會尋尾，食到肚腆腆無知飽！

這下我既經做阿姆咧哩！我也輒輒炆爌肉。毋過，感覺該味緒無頭擺恁湛斗，該無知爭差佇奈位呢?