阿芳心曲

吾家官從6/26入院以來，到今還吂出院。

佢睡在病床頂高，天落下來乜無厥个漦事。這期間經過了四隻風搓──蘇力、敏督那、譚美、天兔，一抹煞同佢無關係，該佢倒在醫院个眠床項，到底係幸抑係不幸？

7/19到9/13在台中榮總神經外科加護病房倒了會兩個月，後四禮拜做盡無食──連鼻胃管就停止餵食，無食當然營養不良，9/13轉到大甲百年醫院光田，腎臟科主治女醫師，建議每週三次隨洗腎時，補充白蛋白營養針，一劑1800元，每天還愛補充300元一劑个胺基酸。

問題在於維持了厥个圓身，佢還係脫離不了臥床同兩管──鼻胃管&氣切管，還完全無自主行動个能力。據醫師判斷，厥視覺&聽覺能力幾近乎零，除非奇蹟出現，佢永遠不可能康復，連企起來就不可能。

9/18該日下晝，我同老周滿心期待將佢從加護病房轉至一般病房機構床。

第二日[八月半]朝晨，老周一儕人打早七點零鐘就去醫院同厥爸做復健，萬萬無想到，吾家官旋風[暫時停止呼吸]，經過醫生CPR了後，隨時又徙轉心臟科加護病房。唉哟！既經脫離呼吸器，做得自家透氣了個過月了，這滿又鬥轉呼吸器了！經過了兩日，今晡朝晨9/21十點開始，關閉呼吸器，下晝看佢，當食力在該透氣，當悿樣仔，連目珠就無打開來，肚屎肨風，聽講恢復了鼻胃管進食50CC了，恁久無食東西，愛試試仔一息息仔加兜等，無斯腸胃會堵毋著。

做人到包尾恁艱苦，任麼儕就難耐。

這係佢个命，也係做厥世細个「生命中不可承受之輕」。