close
既經靚了兩三隻月个豔紫荊,分人修剪到淨俐俐,講麼个
會遮光線。還吂開淨个花子做盡無了!
今晡日天時冷咻咻。
昨暗晡本成吂十點就想愛睡目,毋過,手忒閒,撙電視遙控器,看一部歐洲電影【援交日記】到11:30正上眠床,吾妹仔笑等講:
[天光日毋使上班?貪看色情片犧牲睡目哦。]隨在佢笑!錯就錯在自家無絕決,當愛堅持个生活規則,絕對愛一成不變,正毋會影響生活。
故所,朝晨7:15正䟘起來,舂舂忙忙打理好兩腳一捙,走到公車站,堵堵好青紅燈同我擋一輛902个,煞煞上車。
伸包尾一禮拜,歸個上學期客語課程就結束了。這隻新學校个學生仔乜真乖,學習精神旺,我當歡喜。
第二節同兩位細人仔復習口試个時節,堵著一位熟識个身影對長廊行過,我衝出去相揇~~~~風信子,對今年六月共下去瑞士自助旅行後,一直無見面。實在歡喜!一下仔,下課前,最靚个校長又過來門口打招呼,講:
[今晡日還冷哟!]我乜當暢!
天時清冷,大自家愛做好自我保暖。至少無落雨就好偷暢,冷算麼个,多著加一領大襖婆就做得,無你買个棉襖放在衫櫥在該漚,當無採!
接下來周休兩日 敬祝
你開心快樂萬事順心
文章標籤
全站熱搜
留言列表