阿芳心曲

石蓮開花，你識看過無?

在好朋友阿明&桂枝个食堂屋面前側角，種有年淰淰掛吊等个石蓮，

這下當當在開花。

頭前个白菜既經上梗開黃花了，

這白菜筍最幼嫩好食。

阿桂枝喊我，係愛食做下摘去，

無佢兜愛改忒，種過別項菜哟。

我再三確定，正煞猛摘，摘著歸大兩包，歡喜轉屋下。

海拔六七百公尺位所个菜特別清甜。

這石蓮花个葉仔，有人專工種來有機涼拌，揾梅仔粉食，已合味。

你敢有食過?

我在通霄新埔个石蓮園火車餐廳个簡餐食過，罔罔仔!

細細蕊个石蓮花，

五皮花瓣像王冠，項高有zongˋ-suˇ-仔(面皰)

抑係[雀斑]个紅紅圓點仔樣仔，當得人惜；

花心親像王冠頂高个珍珠瑪瑙，高貴恁靚。

歕歕punˇ-punˇ个(厚厚的)葉仔，

乜一沿一沿个像一蕊蕊青色个玫瑰花，

也當餳人食看啊係麼个味緒。

有息把仔像[台灣油點草]个雀斑姑娘樣仔，

這金黃色系，分人較多个燒暖。

個年半(一年半)無來這心肝肚个勝地，

總分我淰淰恁多个歡喜。

我目金金仔看到呆。

仰會有恁得人惜个細花仔。

滿壁个石蓮啊石蓮，

恬恬仔開花為麼儕?

 還有紅紅个葉仔，

就係觀音腳下个該蕊花。      (紅色石蓮安到【太妃石蓮】)

觀音大士滿哪仔騰雲駕霧普降甘霖。

祈求觀音賜福分吾所有好朋友

平安康健笑連連啊笑連連

恁仔細

承蒙大家