歡喜教客 @ 阿芳心曲

正式全面上課係這星期開始。

去國小教[客家語]母語，正經當生趣又有意義，至少對我自家來講。我對七月初開始就指導一個小五个細阿妹[客語演講]；到了八月又添加一個小四个細阿妹，這位還加慶，佢舊年小三時節，就得著台北市南區國小組演講第四名，這擺毋使經過9/13个初賽，直接做得參加9/28个複賽。

國小組客語演講有三個題目:

(一). 放尞个時節(放假的時候)；

(二). 我最愛上个課(握最愛上的課)；

(三). 轉屋个路項(放學的路上)。

這兩位學生仔先用華語分別三擺分別寫三篇作文，E-mail分我，我翻譯增潤成客語演講稿仔了後，正兩子先生(師生兩人)共下一隻隻字來練習，還愛量時間4分鐘到5分鐘之間，差毋多估算750~850字邊仔。

還愛示範講分佢聽，喊佢錄音起來轉去煞猛練習。恁樣一遍又一遍練到熟絡，也已費氣。前一位選手係學老人，毋過盡認真學習，發音當準，可惜聲音忒細；後一位係[隔代教養]、兩子妹跈阿公阿婆在台北讀書个，六年生个阿哥代表學校客語朗讀；老妹天生就愛表演，厥公會ten手教，故所教起來當順序，今晡朝晨正開始唸第三篇，毋知結果會仰般?這滿斯毋會忒在乎比賽結果了，[盡力就好，無論輸贏]。

共樣个題目，兩儕个經驗全無相同。做先生个我一片翻譯厥个文章，一片欣賞厥个童年生活，試著當好搞。

這下學生仔摎50年前吾个國小生活當然天差地別，乜毋使比麼儕較幸福，時代無共樣了，故所先生儕愛同學生仔般般高，企在細人仔个角度來看厥个世界，恁樣師生較毋會有衝突，教學正歡喜啊!

恁仔細

承蒙你