2014/10/10(六)
昨晡日當晝下課時節,
組長堵著我,好心問我:
[連續上兩日課,喉嗹空堵仔著無?]
[慣仔就好,學生仔無多,係乖乖無番綻吵人,
毋多知仔一節過忒一節,日仔已好過。]我恁樣回答。
我選擇在台北兼課,就係我目前最滿足个生活方式。
親朋好友有兜滿哪仔遊遊野野環遊世界,
我當歡喜佢兜同我分享旅遊个風景同心情;
毋過,我毋會歆羨也自家想愛共樣出去遊覽。
昨晡下晝,吾老公轉台北屋下來。
正一禮拜零無見面,親膩膩仔對我恁好,害我著一下驚。
今晡朝晨,換妹仔跈厥叔伯老弟个車轉去通霄看阿媽。
雙十節歸日_雨無停,
高不將我兩公婆在屋下,各儕做各儕愛做个事,
暗晡時共下欣賞一部武打片趙又挺主演个【狄仁傑之神都龍王】。
我同圖書館借來个有關吳濁流个名著:
【台灣連翹】、【無花果】;【吳濁流致鍾肇政 書簡】,
再看過啊,感覺這位出生在日本時代台灣新竹新埔个客家前輩,
有志難伸一生人就恁樣過忒咧!
[一輩子不長]好友 嫣然恁樣講,
無幾長个人生裡肚,愛仰般來豐富摎充足呢?
叔本華講過:[四十歲以前係生命正文个書寫;四十歲以後係正文个續寫。]
我既經早就舖排好吾个生命,到這下,做自家歡喜个頭路就做得,
毋使同人家來比較,比將講:
高中好友 Wendy年初倈仔結婚無請人,孫仔天光日就愛滿月了;
阿姬單丁妹仔也天光日結婚,恁誠意請食晝,該我就會歡喜去食酒。
吾个倈仔、妹仔有佢兜自家个按算,到這下還吂結婚,也毋使我加愁慮。
吾家娘个生日乜到咧,今年舊曆九月有閏,還做得過兩擺生日哩。
生日生日,還生个日仔日日就愛快樂,
中華民國103年生日快樂?
大自家每日都愛幸福美滿快樂!
甜如蜜
在欉紅
這滿 許教授、阿蘭兩公婆繼續照顧等,
我第一擺食著恁甜个柿仔。
海拔七百公尺白雲深處有人家
何處做毋得為家?
哪位仔就做得歇下來,
單淨你想愛,當然前提係朋友肯收留你。
留言列表