阿芳心曲

朋友湊𠊎共下去新竹看今年通台灣最大各茶花展覽，本成拜二拜三講下晝𠊎做得去，毌過考慮正一晝邊定定，時間忒逼，故所取消行程咧；本成今晡暗晡愛帶兩位同學共下來吾屋下過夜个澳洲吾小娘姑妹仔臨時乜改變行程，無愛來歇一暗晡咧，自然我感覺天轉笠嫲花 ------安然自在又鬆爽。

這兩日吾姨表老妹傳一片電視專題訪問中壢壢新醫院醫生同[大笑俱樂部]莊笑長該兜人个見證，講大笑做得提升免疫力增年添福壽；好朋友也傳來電視專訪[屏東神醫]  楊世敏中醫師講保健祛病个秘訣https://www.youtube.com/watch?v=tBdG_9QTN3I，強調絕症係心理引起个病，大哭大笑都係排遣負面情緒个好方式，當感謝身邊个貴人不時提供珍貴个對待自家个方法。比將講拜二當晝回絕咧旅行社好友建議个東歐行，本旦係𠊎先請教好友這月底去哪位出國散心較好个，佢報講去[捷奧斯匈10日行]俗擱大碗，到時𠊎嗄反悔無想愛去，真敗勢!!!係頭擺𠊎定著當責備自家，毋過這下𠊎同好友會失禮了，時間會分𠊎答案，下二擺定著還有機會報答厥个恩情。

昨晡臨暗仔有去河脣花遶，無看到阿賴老師同阿廖哥。看著當多隻山阿鵲(喜鵲)在草坪跳上又跳下；看著玫瑰花還共下在樹頭搖啊搖；看著榕樹親像大犀牛企在河壩脣；看著松山機場起飛个飛行機一輛一輛天頂飛過，消失在烏雲肚。日仔共樣一日一日過，天烏咧，睡一覺目；天光哩 ，又新个一日開始咧哩。總愛自家身體華麗，全家順序平安，親戚朋友健康快樂，社會和捼國泰民安，風調雨順世界和平。

恁仔細

祝福大家

山阿鵲啊山阿鵲

歸身烏seˊ-pi-loˋ同白淨个袷仔

親像一位溫柔和捼个歐基桑

飛起來翼霞胛下還有藍寶石的青溜溜

想愛同你共下搞

你嗄掬屎噴天無愛同人尞