close
週末兩日轉去通霄，就在灶下無閒直掣兩晝邊，家務事最好搣个就係煮食。最近煮[茶葉蛋]兩擺，越來越順手。
下了火車吂轉到屋下，路脣就買兩扎芥藍菜:
這大梗个[狗問菜]係細人時節最惱食个青菜，因爭無油無摎淨水煮个芥藍菜有一息仔苦篤苦篤，根本毋好食。該央時𠊎問吾三姑，這係麼个菜?佢頂碓𠊎講[狗問菜]。吂知大咧，𠊎寒天最愛食个青菜就係芥藍菜筍。
蘿蔔仔同番茄係拜日朝晨同本地人家買个。蘿蔔仔烳酸梅水，排宿便講有效；番茄炒卵，屋下人當好食。
最奇妙个係轉台北坐海線復興號，板橋站後會到台北站个時節，𠊎對等對面坐个一位歐巴桑微微笑，說佢手嫩白淨親像觀音娘，結果廣播[會到台北]時節，佢準備下車拿包袱袋仔肚个調羹白(青江菜)分𠊎，害𠊎著一下驚，畚筍大支現摘个，該暗晡就現煮，實在有好食。𠊎毋識佢，佢嗄對𠊎恁親切，黏時分享厥朋友種个菜分𠊎，台灣人真有人情!
過咧一日清冷落雨天咧，吾心頭間還異燒暖，佢觀音娘樣个形影永久囥在吾心肝肚。
文章標籤
全站熱搜
留言列表
