阿芳心曲

這拜一，八月半三連假包尾个下晝，老周載我轉台北來。對五月節前三禮拜到這下，會四隻月佢無插我，放我自家在台北自由自在，這中央換冰箱自家來，整浴堂伸縮桿同熱水機這兜，做盡我自家處理，不得不佩服自家个堅耐。

四月中家娘小中風，五月初佢還渡厥姆去日本尞一輪，轉來吾家娘親像忽然間老化盡多，身體親像溜滑梯對頂溜到尾，日合夜照顧胃口毋好唉唉唧唧个老哀仔，實在難為一個大男仔人。

避暑兩隻月，我在台北無想愛ten佢。開學頭禮拜家娘發蛇，三四日後嗄胃出血入院，好得第三日外勞來報到，我就毋使一隻心十五支吊桶七上八下等，做得專心上課，放尞正轉老屋去。

這拜一到拜三，拜二當晝，妹仔請食晝後，佢幫我去圓山園藝中心領轉一包申請个有機土壤10公斤裝。第一擺使用厥老人悠遊卡，三月領著到今半年咧!還過幫抽油煙機拆下清潔，洗衫機調整，總講，我毋壁，生活過程中央還愛靠佢就著。

今晡當晝我還在教室陪伴天光日愛上場[客語字音字形比賽]个學生仔，無法度坐12:50該班自強號火車轉屋下，毋過心肚乜有想愛轉去看看啊，仰會恁放毋開?

PS:9/29北市國語文競賽客語國小組

[客語字音字形]

對小三就跈等學習，今年小六去參賽，得著第二名。

三年有成!當暢。

[客語朗讀]

優勝，無得前六。毋過乜當慶!

總講:盡了力就好!