講一聲
珍重再見
聲聲句句代表
吾个祝福
感恩感謝
客語學習
有你 有我 有大家
歡歡喜喜來學客
今晡日係小六最尾一堂[鄉土母語]課。6/18畢業式後,佢兜就放尞诶。
這共下學客兩年个學生仔,既經當有情感咧。毋盼得恁得人惜个細人仔旋風就離開哩!
同佢兜約束,下二擺有閒正過轉來尋我尞,毋知佢兜有聽入心無?
天下無不散个桌席,來來去去,送忒舊人,再迎過新人入來,一批過一批,年視年,我就係頭那毛蓬白,目珠花花,十足个老阿婆一個咧!
打幫有這兜小朋友做得分我有做阿婆渡孫仔个滿足感覺,感覺自家[有頭路正有生活]个滿足,定著愛珍惜。這下教學生態無比頭擺,學生仔共樣有基本人權,做先生儕愛知得尊重、了解、照顧、責任个道理,做毋得濫糝動手動嘴、無堵好就會分學生仔誤會你又打又罵,絕對係大禁忌。因為這係選修課程,分學生仔快樂學習就好;雖然聽、說基本能力,大部分學生仔讀咧六年,還係[鴨仔聽雷]有聽無識,毋過你有心教,佢無心學,一個巴掌搭毋響,該就隨在佢去哩!
國小畢業後,日後求學過程肚,有幾多機會再過學客語? 講客語? 也毋係吾能力範圍做得把握个。仰般講,做一個母語支援工作人員愛知得自家个本等,有幾多能力就做幾多責任。
會放暑假咧! 乜感覺當悿哩! 當想放一個長假,去一個無人熟識个生份位所歇睏一棧仔。毋過,一想着客語朗讀、演講選手指導,同鼓勵[客語初級認證]這兜微毛末節个事頭,我就一隻頭那兩個大,無結無煞。做得神經放較大條兜仔無?
一個個細天使
親像自家个孫仔
分我歡喜多過愁
文章標籤
全站熱搜
留言列表