2012-12-21(五)壬辰年冬至。
打早，天正光，阿蘭(印傭)就煮好甜雪圓一細碗公，兜上三樓神明廳放等。吾兩公婆hong了床，就先拜阿公婆。
成十分咧過去，吾家娘跋上來，看著無鏨cam事(不對勁)講：
「香既經燒了一半較加，仰吂燒金？」我遽遽行前ten燒金。佢續等講：
「毋係講好愛去市場買菜，還在樓頂搞(電腦)？等較慢仔斯買無！」
「一個在樓下搞(指吾老公、厥倈仔)，一個在樓頂搞，拜阿公婆拜到半亂lan棧can」看佢略略仔無異歡喜，我恬恬企在脣陪笑面。佢將擺碗──佛祖、阿公婆前个各三碗，再過加一碗湊七碗，連同各擺上一副筷仔，歸下擺在阿公婆頭前；又正點三支香拜，還交代我，香燒三股一股(三分之一)時，就愛燒金。
佢就下樓渡阿蘭去買菜了。包尾，吾老公上來，完成了後棧事頭。講白來，對年節拜喏這件事，吾盡無耐心來學習。
全站熱搜
留言列表
