阿芳心曲

連續兩日好天時，我嗄恬恬靜靜在屋下，同老周、妹仔[守等屋下、守等幸福]。

昨晡日拜日，臨晝仔出門去基隆河脣，台北富邦舉辦馬拉松比賽，吂結束。我愐格友陳勇毅可能有參加哟?!

這央時，日頭恁烈，阿賴在橋下背合唱譜。我兩儕打了一點鐘嘴鼓，正去花園做事。我種了6頭木瓜秧，老周講，經過徙動个就無會打子哩!

管佢!等往年風搓做大水，麼个就分水打淨淨了，先種看啊!到時正來看啊!

成時愐著這三、四個食飽忒閒个阿妹、阿巴桑，何嘛死苦恁辛苦，在毋係自家个土地來搣東搣西呢?

毋過，這種趣味，係無親身經歷个，我無法度同你分享其中个快樂。

過晝點過鐘邊仔，我正想愛轉屋食晝時節，吾老公來花園尋我共下騎自行車去淡水，佢單淨帶兩隻椪柑定定。

兩儕迎風踐等就去，佢一直在握頭前。過圓山兒童樂園脣口，佢頓恬等我，問我:

「恁多人排隊等搞个人山人海，你愛翕起來無?」

齁!有麼个好翕个?我同佢拂fin頭(搖頭)講，無愛。

其實，我肚枵到歸身無力。過了百齡橋，來到北市棒球協會河壩脣，兩位歐吉桑在釣魚。我頓恬下來，擘隻柑仔食半隻，用手機同老周講，我愛回頭哟；喊佢自家繼續行，當然恁黏餔娘个佢，黏時同我共下[回頭是岸]。

我建議去圓山飯店食晝，毋過還愛對左岸轉去對片，經過新生陸橋大路，牽等自行車，阿姆哀!還係遽遽轉屋下食自家，較省力!

幸福，係一種親身去做，係共下做了麼个，毋係看起來係仰般。

恁仔細!

承蒙你!