阿芳心曲

阿嬤親手切好的老薑片&剁好的紅面鴨肉塊

上禮拜轉屋下个時節，吾家娘就分ngaiˇ切好个薑嫲同剁好个番鴨公肉各一包，交代ngaiˇ轉到台北，愛煮「薑嫲鴨」分大細食。

佢講，佢買一隻大紅面鴨，分做三份，屋下佢自家留一份，另外兩分分吾小郎叔姆同ngaiˇ。

昨晡日天時旋風變冷，又歸日落雨無出門，ngaiˇ就浸糯米、泡香菇，想愛燜糯飯同燉「薑嫲鴨」。

堵好看到報紙項有講，燉補愛先將藥材「頭遍」、「尾遍」水煮30~60分鐘後，將藥汁水摎食材共下煮30~60分，恁樣養分正毋會分藥材犀收忒──除非你將該中藥也食落肚笥肚。故所，ngaiˇ既經將用麻油爆到燥燥个薑嫲片同黨蔘、黃耆、紅棗、枸杞子、當歸、牛眼乾一鍋煮兩遍水，泌起个湯正摎鴨肉共下半水酒慢火燉煮，滾後5分鐘，放入燜燒鍋大約一點鐘，就完成咧！味緖異清可，ngaiˇ當滿意。

「感謝阿嬤个愛心」，ngaiˇ同兩個細人仔講。

毋過，續等用爆過薑嫲个麻油煮糯飯，味緖就有爭差。ngaiˇ又假會摎摎加加一千擔：臘煙腸、菜脯、腈豬肉、香菇，做盡摎共下，結果煮出一鍋「怪味鹹糯飯」，試著有一息仔苦篤，「請你下二擺毋好加臘煙腸，好無？」吾倈仔恁仰對ngaiˇ講。

又實驗失敗咧哩！無相干，再牯加油、改進，最好愛照食譜上師傅个配方來做，毋好儘採亂亂煮，這下細人仔斯無恁好蓄哦！