去年五月邊仔，我著著左片腳㬹zangˊ同兩隻腳指公个皮膚病症，醫咧年半較加个時間，無半點烏青，顛倒還較加惡化，越來越大片，本成毋會癢，這下會當癢。
我對這疑難雜症做得講完全放棄希望，想歸生人就同佢[共下存亡]好哩!吂知，吾个好老公，引想辦法愛同我治療，11月初佢買[療黴舒]兩禮拜膏一到个藥膏，喊我愛有耐心膏，乜做毋得去泅水。我乖乖聽命行事，結果無釘din無仃dangˇ(無動靜)無效果。佢煞猛為我上網尋先生掛號。
12/17(一)朝晨，我去台大兒童醫院免疫皮膚科看朱家瑜醫師，有一位實習醫生當詳細先[病史詢問]後，朱醫師就開微量美國仙丹个藥膏分我膏，頭擺我乜識膏過个藥仔啊!診斷係[異位性皮膚炎]，吾老公認為毋係乾癬，係有藥醫、會斷根就好啊!
我希望這擺，朱醫師係我正經个救星。
下背係吾好朋友愛真厥哀仔歸生人所受个苦難，係講我也共樣愛忍受恁樣个痛苦，我也無奈何!
*******************************************************
愛真:
農家阿姆个圓身藏等苦處 無人知个病〈蟹足腫〉
吾姆思想當保守
伊總係春夏秋冬著到包塞塞〈包緊密〉
毋敢掀開厥衫褲露出胸前肚屎皮〈肚皮〉分人看到
農家人煮食挲草割禾曬穀常透虐ngiogˋ削xiogˋ〈刺激難耐〉汗流脈落〈汗流浹背〉
趕事常節又強強做到撸牛樣仔歸身又癢又紅又腫又痛
到佇du毋著diauˇ〈忍不住〉个時節 就囥〈藏〉在房間肚噭眵ziiˊ偷捽目汁
發病仔都還共樣自家暗暗仔關門憑ben等denˋ〈靠著〉眠床垛〈床緣〉捽圓身〈擦澡〉糊goˇ藥膏〈塗藥〉
跔giuˊ跔giuˊ羞羞xiuˊ〈畏縮〉毋肯脫衫畀厥心臼〈媳婦〉洗身哩
在厥想法盡愁人看著厥肚屎皮恁大疤又賁punˊ賁〈厚厚〉會分人驚著棄嫌佢
好佳在〈幸好〉佢降〈生育〉兩隻細妹仔〈女生〉會勸化伊 開化兜莫恁戇
安慰伊看病摎伊洗秋〈洗乾淨〉帶去醫院治療 係無啊就盡衰過〈可憐〉哩喲
農家阿姆个苦處 摎大家分享!
註解：
留言列表
